ԲՐԱՈՒՆԸ ԵՎ ՍԱՐԿՈԶԻՆ ՄԻԱՍԻՆ ԳՐՈՒՄ ԵՆ ԴԱՐՖՈՒՐԻ ՄԱՍԻՆ
31-08-2007 17:30:00 | Հայաստան | Միջազգային
ԼՈՆԴՈՆ, 31 ՕԳՈՍՏՈՍԻ, ՆՈՅՅԱՆ ՏԱՊԱՆ: Մեծ Բրիտանիայի վարչապետ
Գորդոն Բրաունը եւ Ֆրանսիայի նախագահ Նիկոլա Սարկոզին աշխարհին կոչ
են արել ակտիվ միջոցներ ձեռնարկել Սուդանի արեւմուտքում Դարֆուրի
շրջանում կրակի դադարեցումն ապահովելու ուղղությամբ: Երկու
առաջնորդները համատեղ հոդված են գրել, որը միաժամանակ հայտնվել է
Լոնդոնի «Թայմս» եւ փարիզյան «Մոնդ» թերթերի էջերում:
Մեկ ամիս առաջ ՄԱԿ-ի Անվտանգության խորհուրդը հավանություն էր
տվել այդ շրջան խաղաղապահներ ուղարկելու մասին բանաձեւին, որտեղ
սեւամորթ ապստամբների եւ «Ջանջավիդ» արաբական աշխարհազորի զինված
դիմակայության սկզբից ի վեր զոհվել է, ինչպես ենթադրում են,
առնվազն 200 հազար մարդ եւ 2 միլիոնից ավելին փախստական է դարձել:
ՄԱԿ-ի եւ Աֆրիկյան միության համատեղ խաղաղարարական
առաքելությունը, ինչպես գրում են Բրաունը եւ Սարկոզին, պետք է
Դարֆուրում խաղաղության հաստատման սկիզբ դնի, որտեղ, ըստ նրանց,
անհրաժեշտ են համաշխարհային հանրության ակտիվ գործողությունները
շարունակվող զինված բախումների դադարեցման ուղղությամբ: