ՉՈՐՐՈՐԴ ՀԱՄԱՀԱՅԿԱԿԱՆ ԽԱՂԵՐԻ ԱՆՑԿԱՑՈՒՄԸ ՀԱՅԱՍՏԱՆ-ՍՓՅՈՒՌՔ
ԿԱՊԵՐԻ ԱՄՐԱՊՆԴՄԱՆ ՀԱՐՑՈՒՄ ԱՄԵՆԱՄԵԾ ԳՈՐԾՆԱԿԱՆ ՔԱՅԼՆ ԷՐ,- ԱՍՈՒՄ Է
ՌՈԼԱՆԴ ՇԱՌՈՅԱՆԸ
28-08-2007 21:40:00 | Հայաստան | Սպորտ
ԵՐԵՎԱՆ, 28 ՕԳՈՍՏՈՍԻ, ՆՈՅՅԱՆ ՏԱՊԱՆ: Չորրորդ համահայկական
խաղերի անցկացումը ամենամեծ գործնական քայլն էր Հայաստան-Սփյուռք
կապերի ամրապնդման հարցում: Օգոստոսի 28-ի ասուլիսում նման տեսակետ
հայտնեց Համահայկական խաղերի համաշխարհային կոմիտեի փոխնախագահ
Ռոլանդ Շառոյանը: Նրա խոսքերով, ի թիվս բազմաթիվ դրական
փոփոխությունների, այս տարի արձանագրվեցին նաեւ մի շարք
բացթողումներ, մասնավորապես խաղադաշտերի, դահլիճների ոչ պատշաճ
վիճակը, որոնց բարեկարգման համար, ըստ Ռ.Շառոյանի, չբավականացրին
խաղերի անցկացման համար հատկացված ֆինանսական միջոցները: Նշենք, որ
չորրորդ համահայկական խաղերի ընդհանուր բյուջեն կազմում էր մոտ 80
մլն դրամ (մոտ 235 հազար ԱՄՆ դոլար):
Ռ.Շառոյանը միաժամանակ օրինաչափ համարեց այն փաստը, որ
խաղարկվող մեդալների զգալի մասը բաժին հասավ հայաստանցի
մարզիկներին: «Հայաստանում կան մարզական հզոր բազաներ, եւ մեր
մարզիկները միշտ լավ մարզավիճակում են»,- ասաց նա` նշելով, որ
սփյուռքի մեր հայրենակիցները միայն վերջին 2 ամիսներին են
ինտենսիվորեն նախապատրաստվել մրցումներին:
Անրադառնալով Երեւանի եւ Կահիրեի բասկետբոլի թիմերի հանդիպման
ժամանակ տեղի ունեցած լուրջ միջադեպին, կազմկոմիտեի ներկայացուցիչը
հայտարարեց, որ Երեւանի թիմը զրկվել է հաջորդ համահայկական խաղերին
մասնակցության իրավունքից: Ըստ Ռ.Շառոյանի, նախատեսվում է, որ
նույնպիսի որոշում կկայացվի նաեւ Ստեփանակերտի ֆուտբոլի թիմի
վերաբերյալ: