ԵՐԵՎԱՆ, 20 ՕԳՈՍՏՈՍԻ, ՆՈՅՅԱՆ ՏԱՊԱՆ: ՀԽՍՀ ժողովրդական նկարիչ
Էդվարդ Իսաբեկյանի մահվան կապակցությամբ ստեղծվել է կառավարական
հանձնաժողով` ՀՀ փոխվարչապետ Հովիկ Աբրահամյանի նախագահությամբ:
Կառավարական հանձնաժողովը օգոստոսի 20-ին տարածել է
հաղորդագրություն, որում ասված է.
«Հայ կերպարվեստը ծանր կորուստ կրեց. 93 տարեկան հասակում
կյանքից հեռացավ ՀԽՍՀ ժողովրդական նկարիչ, ՀՀ պետական մրցանակի
դափնեկիր, պրոֆեսոր, Երեւանի պատվավոր քաղաքացի Էդվարդ Իսաբեկյանը:
Էդվարդ Իսաբեկյանը ծնվել է 1914թ. Երեւանի նահանգի Սուրմալու
գավառի Իգդիր քաղաքում: 1918թ. ընտանիքի հետ Երեւան տեղափոխվելուց
հետո սովորել եւ ավարտել է Երեւանի գեղարվեստա-արդյունաբերական
տեխնիկումը (ներկայիս Փ.Թերլեմեզյանի անվան գեղարվեստի
ուսումնարան), ապա` 1935 թվականից ուսումը շարունակել Թբիլիսիի
գեղարվեստի ակադեմիայում:
Հայրենական Մեծ պատերազմի տարիներին Նաիրի Զարյանի եւ Սողոմոն
Տարոնցու հետ եղել է ռազմաճակատում` հայկական 89-րդ դիվիզիայի
վերաբերյալ նյութեր հավաքելու եւ գեղանկարչական գործեր ստեղծելու
նպատակով:
Էդվարդ Իսաբեկյանը Երեւանի գեղարվեստի պետական ինստիտուտի
հիմնադիրներից էր, որտեղ աշխատել է 1945 թվականից մինչեւ կյանքի
վերջը` ղեկավարելով գեղանկարչական արվեստանոցներից մեկը:
Մանկավարժական ավելի քան 60 տարիների ընթացքում նա ստեղծել է իր
դպրոցը եւ ուսուցման գիտական մեթոդիկան, կրթել ու դաստիարակել
շնորհալի արվեստագետների առնվազն երեք սերունդ:
Դասախոսական աշխատանքին զուգընթաց, էդվարդ Իսաբեկյանը կատարել
է բազմաթիվ հասարակական աշխատանքներ` բազմիցս ընտրվել Երեւանի
քաղաքային խորհրդի պատգամավոր, Հայաստանի նկարիչների միության
քարտուղար:
1967-ից մինչեւ 1987թ. եղել է Հայաստանի պետական (ներկայումս
ազգային) պատկերասրահի տնօրենը, որտեղ հսկայական ջանքեր է
գործադրել ֆոնդերի հարստացման եւ հատկապես անցյալի ազգային
արժեքները կորստից փրկելու ուղղությամբ: Նրա նախաձեռնությամբ է
բացվել պատկերասրահի Գյումրու մասնաճյուղը:
Իսաբեկյան արվեստագետի շռայլ տաղանդը ամենատարբեր
դրսեւորումներ է ստացել ինչպես գեղանկարչական մեծածավալ
կոմպոզիցիոն կտավներում, այնպես էլ` արվեստի հիմնահարցերին նվիրված
ուշագրավ հոդվածներում, հրապարակային ելույթներում եւ
հուշապատումներում: Էդվարդ Իսաբեկյանի արվեստի հիմքը
մարդասիրությունն ու խոր հայրենասիրությունն են, իսկ ոգեշնչման
ակունքները` հայաշունչ գաղափարները, որոնք նրա գործերում
արտահայտվել են Սասունցի Դավթի, Ծովինարի, Դավիթ Բեկի,
Սայաթ-Նովայի, Ակսել Բակունցի, Թամանցիների եւ ազգային ուրիշ
մեծերի կերպարներում: Մեծ վարպետությամբ ու հայեցի մտածողությամբ
ստեղծված նրա հիասքանչ կտավները նաեւ համամարդկային հնչողություն
ունեն: Նրա անուրանալի ներդրումը կերպարվեստում նաեւ այն է, որ նա
եղավ թեմատիկ կոմպոզիցիոն ժանրի հիմնադիրը Հայաստանի
Հանրապետությունում, որին հետեւեցին ուրիշները: Նա խոր ակոս է
թողել հայ կերպարվեստում:
Իսաբեկյանի բարձրարժեք արվեստը միշտ էլ եղել է արվեստաբանների
ուշադրության կենտրոնում: Նրան են նվիրված բազմաթիվ ստվարածավալ
ուսումնասիրություններ, հոդվածներ, մենագրություններ: Հայաստանի
ազգային պատկերասրահը հատուկ սրահ է հատկացրել նկարչի աշխատանքների
մշտական ցուցադրման համար:
Էդվարդ Իսաբեկյանը երկրին ու ժողովրդին մատուցած ակնառու
ծառայությունների համար իր երկարամյա վաստակաշատ կյանքի ընթացքում
արժանացել է բազմաթիվ մրցանակների ու պարգեւների, այդ թվում`
2004թ.-ին Ամենայն Հայոց Կաթողիկոսի կողմից «Սուրբ Սահակ-Սուրբ
Մեսրոպ» շքանշանի: Արժանացել է Երեւանի պատվավոր քաղաքացու կոչման:
Նա նաեւ «Իգդիր» հայրենակցական միության պատվավոր նախագահն էր:
Երեւանի քաղաքապետարանը Էդվարդ Իսաբեկյանի կենդանության օրոք
որոշում է կայացրել ստեղծելու նրա գեղանկարչական աշխատանքների
մշտական ցուցադրության սրահ:
Հիանալի մարդու, մեծ արվեստագետի ու քաղաքացու հիշատակը միշտ
վառ կմնա ժողովրդի, նրա լուսավոր արվեստի բոլոր երկրպագուների
սրտերում»:
Հանձնաժողովը տեղեկացնում է, որ Էդվարդ Իսաբեկյանի
քաղաքացիական հոգեհանգիստը տեղի կունենա օգոստոսի 21-ին, ժամը
18:00-ից, Սայաթ-Նովա 5 հասցեում: Օգոստոսի 22-ին, Ալ.Սպենդիարյանի
անվան օպերայի եւ բալետի ազգային ակադեմիական թատրոնի Արամ
Խաչատրյան մեծ դահլիճում (մուտքը Մ.Մաշտոցի պողոտայից) ժամը
12:30-14:00-ին տեղի կունենա վերջին հրաժեշտը նկարչին, այնուհետ`
հուղարկավորության արարողությունը` Երեւանի Կոմիտասի անվան
պանթեոնում: