ԱՄՆ-Ը ՇԱՐՈՒՆԱԿՈՒՄ Է ԴԵՄ ՀԱՆԴԵՍ ԳԱԼ ԹՈՒՐՔԻԱՅԻ` ՀՅՈՒՍԻՍԱՅԻՆ
ԻՐԱՔՈՒՄ ՀՆԱՐԱՎՈՐ ՌԱԶՄԱԿԱՆ ԳՈՐԾՈՂՈՒԹՅՈՒՆՆԵՐ ՍԿՍԵԼՈՒ ԾՐԱԳՐԵՐԻՆ
28-06-2007 16:06:00 | ԱՄՆ | Միջազգային
ՎԱՇԻՆԳՏՈՆ, 28 ՀՈՒՆԻՍԻ, ՆՈՅՅԱՆ ՏԱՊԱՆ: ԱՄՆ-ը բացասաբար է
արձագանքել Թուրքիայի Զինված ուժերի գլխավոր շտաբի պետ Յաշար
Բույուքանըթի` Հյուսիսային Իրաքում ռազմական գործողություններ
սկսելու անհրաժեշտության մասին նախօրեին արած հայտարարությանը:
ԱՄՆ-ի պետքարտուղարության մամլո խոսնակ Շոն Մքքորմակը
հայտարարել է, թե ԱՄՆ-ը հասկանում է, որ թուրքական բանակը
ցանկանում է թուրք ժողովրդին պաշտպանել ահաբեկչական
կազմակերպությունների հարձակումներից` միեւնույն ժամանակ նշելով, թե
Թուրքիայի` Իրաքում ռազմական գործողություններ սկսելը հարցի
լուծում չի կարող դառնալ. «Քրդստանի բանվորական կուսակցությունը
(PKK) ահաբեկչական կազմակերպություն է: Սակայն թուրքական
ուժերի` Իրաքում ռազմական գործողություններ սկսելը ստեղծված
իրավիճակի համար հարցի լուծում դառնալ չի կարող»,- հայտարարել է
մամլո խոսնակը:
Շոն Մքքորմակը նշել է նաեւ, որ հարցը կարող է լուծվել երկու
պետությունների կառավարությունների համագործակցությամբ. «Այս
ընդհանուր սպառնալիքի դեմ պայքարելու համար անհրաժեշտ է, որպեսզի
միասնաբար հանդես գան թուրքական եւ իրաքյան կառավարությունները:
Մենք շարունակում ենք աշխատել թե' թուրքերի, եւ թե' իրաքցիների հետ եւ
միեւնույն ժամանակ ձգտում այս հարցի շուրջ երկու պետությունների
միջեւ ստեղծել համագործակցություն»,- հայտարարել է ԱՄՆ
պետքարտուղարության մամլո խոսնակը:
Հիշեցնենք, որ հունիսի 27-ին մամլո ասուլիսի ժամանակ
Թուրքիայի ԶՈՒ գլխավոր շտաբի պետ Յաշար Բույուքանըթը հայտարարել էր
Հյուսիսային Իրաքում PKK-ի դեմ ռազմական գործողություններ սկսելու
անհրաժեշտության մասին: