ԵԹԵ ՊԵՏԱԿԱՆ ՄՏԱԾՈՂՈՒԹՅՈՒՆ ԼԻՆԻ, ԱՊԱ ՀԱՅԿԱԿԱՆ ՄՇԱԿՈՒՅԹԸ
ԿԶԱՐԳԱՆԱ ԵՎ ԴՈՒՐՍ ԿԳԱ ՀԱՄԱՇԽԱՐՀԱՅԻՆ ՇՈՒԿԱ,- ԱՍՈՒՄ Է ՌՈՒԲԵՆ
ԱՆԳԱԼԱԹՅԱՆԸ
26-06-2007 16:30:00 | Հայաստան | Մշակույթ
ԵՐԵՎԱՆ, 26 ՀՈՒՆԻՍԻ, ՆՈՅՅԱՆ ՏԱՊԱՆ: «Այսօր ոչ միայն հայկական,
այլեւ տարբեր ազգերի մշակույթները գտնվում են կոլապսի մեջ»,- այս
տեսակետը հայտնեց մշակութաբան Ռուբեն Անգալաթյանը հունիսի 26-ի
ասուլիսում: Նրա խոսքերով, այսօր ամեն ինչ վերածվել է շոուի,
գնահատվում են ոչ իրական արժեքները, եւ այդ պատճառով էլ
Հայաստանում իսկական արվեստը գնալով մղվում է ետին պլան: Նա
մասնավորապես նշեց, որ եթե 20-րդ դարի 60-ականներին Երեւանը
համարվում էր մշակութային քաղաք, ապա այսօր մայրաքաղաքում
մշակութային կյանքը անկում է ապրում:
Ըստ Ռ.Անգալաթյանի, եթե պետական մտածողություն լինի, ապա
հայկական մշակույթը ոչ միայն կզարգանա երկրի ներսում, այլեւ դուրս
կգա համաշխարհային շուկա: «Հայաստանում կան այնպիսի նկարիչներ,
որոնց գործերը կարող են մրցունակ լինել համաշխարհային շուկայում:
Բայց դրա համար անհրաժեշտ են ֆինանսական միջոցներ»,- նշեց
մշակութաբանը:
Մշակութաբանի կարծիքով, եթե կինոյի ասպարեզում հայերն ունեն
երկու մեծություն` Փարաջանով եւ Փելեշյան, ապա դա չի նշանակում, որ
հայկական կինեմատոգրաֆիան այսօր գոյություն ունի: Նույն իրավիճակն
է նաեւ թատրոնի բնագավառում: Ռ.Անգալաթյանի խոսքերով, միայն
դասական երաժշտությունն ու քանդակագործությունն են գտնվում հիանալի
վիճակում, բայց, ցավոք, դրանք էլ չեն գնահատվում: «Մենք ունենք
հիանալի քանդակագործներ, բայց Երեւանը լցված է անճաշակ
քանդակներով: Ունենք հիանալի կոմպոզիտորական դպրոց, բայց երիտասարդ
սերունդին մատուցվում է միայն անճաշակ երաժշտություն: Դրա համար
անհրաժեշտ է լուրջ քայլեր ձեռնարկել, որպեսզի չկորցնենք մեծ
դժվարությամբ ձեռք բերածը»,- նշեց Ռ.Անգալաթյանը: