ՓԱՐԻԶ, 25 ՀՈՒՆԻՍԻ, ՆՈՅՅԱՆ ՏԱՊԱՆ: Փարիզում անցկացվում է
սուդանյան Դարֆուր նահանգի հակամարտության կարգավորման միջազգային
համաժողով: Մասնակցում են աշխարհի խոշոր երկրների, այդ թվում
Չինաստանի եւ ԱՄՆ-ի, ինչպես նաեւ ՄԱԿ-ի եւ Արաբական պետությունների
լիգայի ներկայացուցիչներ: Սուդանի կառավարությունը եւ Աֆրիկյան
միության առաջնորդները հրաժարվել են Ֆրանսիա գնալ:
Արդեն հինգերորդ տարին Դարֆուրում շարունակվում է արյունահեղ
ներքին հակամարտությունը, որի զոհ են դարձել հարյուր հազարավոր
մարդիկ, մոտ երկու միլիոն մարդ լքել են իրենց տները: Նահանգը
գտնվում է հումանիտար աղետի եզրին: Երկրի իշխանությունները
միջազգային ճնշման տակ համաձայնել են 20 հազարից ավելի միջազգային
խաղաղապահների ներկայությանը Դարֆուրում: Դրանից բացի, համաժողովի
մասնակիցները առաջարկում են վերահսկողություն սահմանել նավթի
առեւտրից Սուդանի եկամուտների վրա, որպեսզի դրանք չօգտագործվեն
սպառազինությունների գնման եւ Դարֆուրում գործող Ջանջավիտ
կառավարամետ զինված կազմավորումների ֆինանսավորման համար: