ԱՅՍՕՐ ԻՆՏԵԼԵԿՏԸ ՀԵՏԻՆ ՊԼԱՆ Է ՄՂՎԱԾ,- ԱՍՈՒՄ Է ԳՐՈՂ ՎԱՀԵ
ԱՐՍԵՆԸ
18-06-2007 19:55:00 | Հայաստան | Մշակույթ
ԵՐԵՎԱՆ, 18 ՀՈՒՆԻՍԻ, ՆՈՅՅԱՆ ՏԱՊԱՆ: Հեռուստատեսությունը պետք
է ունենա կրթական եւ դաստիարակչական նշանակություն, սակայն
հայկական հեռուստատեսությունն այսօր ողողված է միայն ցածրորակ
հաղորդումներով: Հունիսի 18-ին թարգմանիչ Ալեքսանդր Թոփչյանի հետ
համատեղ ասուլիսում այսպիսի կարծիք հայտնեց Երեւանի պետական
համալսարանի դասախոս, գրող Վահե Արսենը:
«Ինչ դաստիարակության մասին կարող է խոսք լինել, եթե առավոտից
մինչեւ կեսգիշեր հեռուստաեթերով մատուցվում է անորակ
երաժշտություն, տեսնում ենք «աստղերի», որոնք չես էլ հասկանում, թե
ինչ են երգում: Այսօր հայ հասարակությունում առաջին պլանում են
միջակությունները, իսկ ինտելեկտը, ցավոք, հետին պլան է մղված»,-
նշեց Վ.Արսենը:
Ըստ Ա.Թոփչյանի, վերջին տարիներին Հայաստանում ավելացել է
պետապատվերով հրատարակվող գրքերի թիվը, ինչին զուգահեռ նվազել է
գիրք կարդացողների քանակը: «Ներկայումս գիրքն ու գրականությունը
փոխարինվել են այլ արժեքներով, իսկ ստեղծված վիճակը հնարավոր է
ուղղել միայն պետական ռազմավարություն մշակելուց հետո»,- նշեց
թարգմանիչը:
Ա.Թոփչյանի խոսքերով, Հայաստանում հրատարակված գրքերը մեծ
պահանջարկ ունեն Սփյուռքում: Նա այն կարծիքին է, որ տարբեր
երկրների ՀՀ դեսպանատներում պարբերաբար պետք է կազմակերպվեն
հայկական գրքերի ցուցահանդեսներ: Դա, ըստ Ա.Թոփչյանի,
հնարավորություն կտա ոչ միայն հայերին, այլեւ օտարազգիներին
ծանոթանալ հայ գրողների ստեղծագործություններին:
Վ.Արսենը գտնում է, որ հայկական գրականությունը տարածելու
համար անհրաժեշտ է հատուկ մոտեցում: «Եթե մատենաշար է
հրատարակվում, ապա այնտեղ պարտադիր լինում են այս կամ այն
չինովնիկի բարեկամի գործերը: Սակայն մենք պետք է կարողանանք
այնպիսի գործեր ներկայացնել, որոնք մրցունակ են աշխարհում»,- նշեց
Վ.Արսենը: