ՄԵՔՍԻԿԱՅՈՒՄ ԵՎ ՖՐԱՆՍԻԱՅՈՒՄ ԱՆՆԱ ՄԱՅԻԼՅԱՆԸ ՆԵՐԿԱՅԱՑՐԵԼ Է ՀԱՅ
ՀՈԳԵՎՈՐ ԵՐԱԺՇՏՈՒԹՅԱՆ ԳՈՀԱՐՆԵՐԸ
13-06-2007 16:19:00 | Հայաստան | Մշակույթ
ԵՐԵՎԱՆ, 13 ՀՈՒՆԻՍԻ, ՆՈՅՅԱՆ ՏԱՊԱՆ: Մայիսի 14-ից հունիսի 1-ը
երգչուհի Աննա Մայիլյանը մասնակցել է Մեքսիկայում կայացած «Օլին
կան» ամենամյա փառատոնին, որտեղ նա ներկայացրել է հայ հոգեւոր
երաժշտությունը: «ՆՈՅՅԱՆ ՏԱՊԱՆ»-ի թղթակցի հետ զրույցում երգչուհին
նշեց, որ իր համար կարեւոր է, որպեսզի աշխարհի տարբեր բեմերում հայ
հոգեւոր եւ ժողովրդական երաժշտությունը ներկայացվի անաղարտ, բայց
նորովի մեկնաբանությամբ:
Հունիսի սկզբներին Ա.Մայիլյանը Հայաստանի տարվա շրջանակներում
համերգներ է ունեցել ֆրանսիական երեք քաղաքներում: Առլ քաղաքի
Ազգային պատկերասրահում բացված «Հնագույն Հայաստան» ցուցահանդեսին
զուգահեռ Ա.Մայիլյանը ներկայացրել է հայ հոգեւոր երաժշտության
գոհարները: Իսկ Պերուժում երգչուհու համերգին մասնակցել է նաեւ
ֆրանսիական հայտնի «Դեբյուսի» քառյակը` կատարելով կոմիտասյան
ստեղծագործություններ:
Ա.Մայիլյանը ներկայումս համագործակցում է իտալական «Պրոմեթեո»
լարային քառյակի հետ: Վերջերս Երեւանում կազմակերպված «Ազգային
պատկերասրահ» միջազգային երաժշտական փառատոնի շրջանակում երգչուհին
եւ քառյակի անդամները հանդես են եկել կոմիտասյան կատարումներով: