ՀՈՒՆԻՍԻ 12-ԻՆ ԵՐԵՎԱՆՈՒՄ ԿԿԱՅԱՆԱ ՌՈՒՍԱՍՏԱՆԻ ՕՐՎԱՆ ՆՎԻՐՎԱԾ
ՀԱՄԵՐԳ
12-06-2007 19:15:00 | Հայաստան | Մշակույթ
ԵՐԵՎԱՆ, 12 ՀՈՒՆԻՍԻ, ՆՈՅՅԱՆ ՏԱՊԱՆ: Հունիսի 12-ին Երեւանի
Կոմիտասի անվան կամերային երաժշտության տանը կկայանա Ռուսաստանի
օրվան նվիրված համերգ` Չայկովսկու անվան մրցույթի դափնեկիր
երաժիշտների մասնակցությամբ: Ինչպես նույն օրվա ասուլիսում նշեց ՀՀ
մշակույթի փոխնախարար Կարինե Խոդիկյանը, համերգը կազմակերպվել է
«ՀՀ մշակույթի եւ երիտասարդության հարցերի ու ՌԴ մշակույթի եւ
կինեմատոգրաֆիայի դաշնային գործակալության միջեւ 2007-2009թթ.
համագործակցության մասին» ծրագրի շրջանակներում:
Փոխնախարարը հայտնեց նաեւ, որ Հայաստանում Վրաստանի եւ
Վրաստանում Հայաստանի դեսպանատների աջակցությամբ հունիսի 15-ին
Երեւանի «Առնո Բաբաջանյան» համերգասրահում համերգով հանդես կգա
Կովկասյան կամերային նվագախումբը: Այն գործում է Վրաստանի առաջին
տիկին Սանդրա Սահակաշվիլի-Ռուլոֆսի հովանու ներքո: 2005թ.-ին
հիմնադրված նվագախմբի կազմում ընդգրկված են հայ, վրացի, ադրբեջանցի
եւ այլազգի 17 երաժիշտներ: Մինչեւ տարեվերջ նվագախումբը
համերգներով հանդես կգա նաեւ Ֆրանսիայում, Գերմանիայում,
Բելգիայում, Նիդեռլանդներում եւ Իսպանիայում: