ՀԱՅԱՍՏԱՆԻ ԱՌԱՋՆՈՒԹՅՈՒՆՈՒՄ ՀՐԱՁԻԳՆԵՐԻ ՑՈՒՅՑ ՏՎԱԾ
ԱՐԴՅՈՒՆՔՆԵՐԸ ԲԱՐՁՐ ԵՆ ԵՎ ՀՈՒՍԱԴՐՈՂ
16-04-2007 15:44:00 | Հայաստան | Սպորտ
ԵՐԵՎԱՆ, 16 ԱՊՐԻԼԻ, ՆՈՅՅԱՆ ՏԱՊԱՆ: Ապրիլի 15-ին Երեւանում
ավարտվեց գնդակային հրաձգության Հայաստանի առաջնությունը, որին
մասնակցեցին 83 մարզիկ-մարզուհիներ:
Ատրճանակ զենքաձեւում կանանց մրցաշարում սպորտի վարպետի
արդյունքով (377 միավոր) հաղթեց Նորա Նիկողոսյանը: Տղամարդկանց
պայքարում առաջինը ճանաչվեց Նորայր Բախտամյանը (591 միավոր):
Հաջորդ 2 տեղերը զբաղեցրին Ն.Բախտամյանի սաները` Ռոմիկ Բարդումյանը
(575) եւ Նորայր Առաքելյանը (567):
Հրացան զենքաձեւում հանրապետական նոր ռեկորդով (395 միավոր)
չեմպիոնուհի դարձավ Անի Առաքելյանը: Տղամարդկանցից սպորտի վարպետի
նորմայով լավագույնը օլիմպիական չեմպիոն Հրաչյա Պետիկյանի որդի
Վահե Պետիկյանն էր` 582 միավոր:
Առաջատարները կնախապատրաստվեն Բանգկոկում մայիսի 3-12-ին
անցկացվելիք աշխարհի գավաթի խաղարկության փուլին: Հայաստանի
հավաքականի գլխավոր մարզիչ Սեյրան նիկողոսյանը «ՆՈՅՅԱՆ ՏԱՊԱՆ»-ի
թղթակցի հետ զրույցում նշեց, որ Հայաստանի առաջնությունում
հրաձիգների ցույց տված արդյունքները բավականին բարձր են եւ
հուսադրող: