ԱՊՐԻԼՄԵԿՅԱՆ ՈՐՈՇ ՄԻՋՈՑԱՌՈՒՄՆԵՐ ՉԵՆ ԿԱՅԱՆԱ` ՀՀ ՎԱՐՉԱՊԵՏ
ԱՆԴՐԱՆԻԿ ՄԱՐԳԱՐՅԱՆԻ ԱՆԺԱՄԱՆԱԿ ՄԱՀՎԱՆ ՊԱՏՃԱՌՈՎ
31-03-2007 14:55:00 | Հայաստան | Մշակույթ
ԵՐԵՎԱՆ, 31 ՄԱՐՏԻ, ՆՈՅՅԱՆ ՏԱՊԱՆ: ՀՀ վարչապետ Անդրանիկ
Մարգարյանի նախաձեռնությամբ ապրիլի 1-ը Հայաստանի պաշտոնական
տոնացույցի մեջ մտավ որպես «Երգիծանքի եւ հումորի» օր, եւ այս տարի
երգիծաբանների մի խումբ վարչապետի աջակցությամբ պատրաստվում էր այդ
օրը նշել մեծ շուքով: Սակայն, ինչպես մարտի 31-ի ասուլիսում
հայտնեց հումորիստ Սամվել Բաղդասարյանը, վարչապետի անժամանակ
մահվան պատճառով մի քանի միջոցառումներ չեն կայանա, այդ թվում`
Ազատության հրապարակում նախատեսված տոնական շքահանդեսն ու
Ալ.Սպենդիարյանի անվան օպերայի եւ բալետի ազգային ակադամիական
թատրոնում կայանալիք «Մեկից մեկ» հումորային համերգը:
«Վարչապետի մահից հետո այս ծրագրերի սցենարներում պետք է
որոշակի փոփոխություններ լինեին, սակայն դրանք կբերեին
կեղծություն, այնինչ երգիծանքն ու հումորը կեղծ լինել չեն կարող»,-
նշեց Ս.Բաղդասարյանը: Նրա խոսքերով, ապրիլի 1-ին Շ.Ազնավուրի անվան
հրապարակում կբացվի երգիծանկարների ապրիլմեկյան ցուցահանդես,
«Ագուլիս» տիկնիկային թատրնում կկայանա «Ծիտը» ներկայացման
պրեմիերան, Արամ Խաչատրյանի տուն-թանգարանում` «Կատակում են
երաժիշտները», Հովհ.Թումանյանի անվան տիկնիկային թատրնում` «Մեծ
հրաշքների փոքր գաղտնիքները» հումորային ծրագրերը:
Ըստ ՀՀ ժողովրդական արտիստ Ռաֆայել Քոթանջյանի, վարչապետը
երգիծանքի եւ արվեստի նկատմամբ ուներ այնպիսի վերաբերմունք, որ
չունեն մեր պաշտոնյաներից շատ շատերը: «Ա.Մարգարյանը գնահատում էր
արվեստը, եւ նրա աջակցությամբ բազմաթիվ ներկայացումներ եւ
մշակութային միջոցառումներ իրականություն դարձան»,- ընդգծեց
դերասանը:
Անդրադառնալով հեռուստաեթերով ցուցադրվող հումորային
հաղորդումներին, «Ոզնի» երգիծական թերթի գլխավոր խմբագիր Արամայիս
Սահակյանը նշեց, որ «ցածր մակարդակի հումորն այսօր խրախուսվում է
այնպես, ինչպես ռաբիս երաժշտությունը», այդ իսկ պատճառով եթերը
ողողված է նմանատիպ հաղորդումներով: Իսկ դերասան Հարություն
Մովսիսյանը կարծիք հայտնեց, որ կգա մի օր, երբ բոլորը կհոգնեն
ռաբիս երաժշտությունից ու գռեհկությունից: