ԺԱԿ ՇԻՐԱԿԸ ՀՐԱՊԱՐԱԿԵԼ Է ԻՐ ՀԵՏՆՈՐԴԻ ԱՆՈՒՆԸ. ԴԱ ՆԻԿՈԼՅԱ
ՍԱՐԿՈԶԻՆ Է
21-03-2007 20:50:00 | Ֆրանսիա | Միջազգային
ՓԱՐԻԶ, 21 ՄԱՐՏԻ, ՆՈՅՅԱՆ ՏԱՊԱՆ: Ֆրանսիայի նախագահ Ժակ Շիրակը
չորեքշաբթի հայտարարել է, որ իբրեւ Ելիսեյան պալատում իր հետնորդ
նախապատվությունը տալիս է կառավարող Ի պաշտպանություն ժողովրդական
շարժման միության (ՊԺՇՄ) թեկնածու Նիկոլյա Սարկոզիին: «Ես իմ ձայնը
տալիս եմ եւ աջակցություն եմ հայտնում ՊԺՇՄ թեկնածուին»,- ասվում է
նախագահի հեռուստատեսային ուղերձում:
Շիրակը հայտնել է, որ մարտի 26-ին Նիկոլյա Սարկոզին կթողնի
ներքին գործերի նախարարի պաշտոնը, հաղորդում է ԻՏԱՌ-ՏԱՍՍ-ը:
Երկուշաբթի 12 թեկնածուների ցուցակի պաշտոնական հրապարակումից
հետո սկսվել է ընտրարշավի այսպես կոչված «միջանկյալ» փուլը, երբ
թեկնածուներից յուրաքանչյուրը ստանում է պետական եւ մասնավոր
հեռուստա եւ ռադիոալիքներով հավասար տեւողությամբ ելույթի
իրավունք: Այդ փուլը կտեւի մինչեւ ապրիլի 8-ը, իսկ 9-ին կկայանա
նախագահական ընտրարշավի պաշտոնական բացումը: «Միջանկյալ» շրջանում
թակնածուները շրջում են երկրում, մասնակցում հանդիպումների եւ
հանրահավաքների: Սարկոզին ծրագրում է, օրինակ, այս շաբաթ մեկնել
«անդրծովյան» ուղեւորության. նա կլինի Մարտինիկայում,
Գվադելուպայում, Ֆրանսիական Գվինեայում:
Օրեցօր սրվում է նախընտրական պայքարը նախագահական մրցավազքի
առաջատար «եռյակի» միջեւ: Սարկոզին վստահորեն մեծացնում է
տարբերությունը. վերջին հարցումները նրան արդեն տալիս են 54%
երկրորդ փուլում, իսկ սոցիալիստ Սեգոլեն Ռուայալին` 46%:
Ցենտրիստների առաջնորդ Ֆրանսուա Բայրուն կրնկակոխ հետեւում է
Սոցկուսակցության թեկնածուին եւ կարող է ռեյտինգով հավասարվել
նրան, ինչը չափազանց կբարդացնի նախընտրական ռեբուսը: