Օ.ԲՈԺԿՈ. ԿԻԵՎՈՒՄ ԿԱՌՈՒՑՎԵԼԻՔ ՀԱՅԿԱԿԱՆ ԵԿԵՂԵՑԻՆ ԴԱՌՆԱԼՈՒ Է
ՀՈԳԵՎՈՐ ԵՎ ՄՇԱԿՈՒԹԱՅԻՆ ԿԵՆՏՐՈՆ ՏԵՂԻ ՀԱՅԵՐԻ ՀԱՄԱՐ
20-03-2007 19:54:00 | Հայաստան | Հասարակություն
ԵՐԵՎԱՆ, 20 ՄԱՐՏԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Ուկրաինական
կողմը պատարաստակամ է ընդլայնել համագործակցությունը Հայաստանի հետ
կրթական ոլորտում: Այսուհետ, հայ ուսանողներն ու ասպիրանտները
ուկրաինական բուհերում կսովորեն ոչ միայն միջպետական պայմանագրի
շրջանակներում, այլեւ նոր ստեղծված միջբուհական համագործակցության
արդյունքում: Այս մասին մարտի 20-ին Վ.Բրյուսովի անվան պետական
լեզվաբանական համալսարանի ուսանողության եւ պրոֆեսորադասախոսական
կազմի հետ հանդիպմանը հայտարարեց Հայաստանում Ուկրինայի արտակարգ
եւ լիազոր դեսպան Օլեքսանդր Բոժկոն:
Դեսպան Բոժկոն նշեց, որ երկու երկրների միջեւ միշտ էլ
գոյություն են ունեցել կրթական կապեր: Այդ կապերի բարձրակետը
արձանագրվել է սովետական տարիներին, երբ հայ երիտասարդները տարիներ
շարունակ կրթվել են Կիեւի բարձրագույն օդաչուական ինստիտուտում,
իսկ կիեւցիները ուսանել են հայաստանյան տարբեր բուհերում:
Հետագայում ընդհատված կրթական կապերն ու լավագույն ավանդույթները
հարկավոր էր վերականգնել, ինչին դրական է արձագանքել ուկրաինական
կողմը` պատրաստակամություն հայտնելով իր բուհերում ընդունել հայ
ուսնողներին եւ մասնագետներին:
Անդրադառնալով Կիեւում կառուցվելիք հայկական եկեղեցու շուրջ
ծագած խնդրին, Բոժկոն հայտնեց, որ Կիեւի իշխանությունները
համաձայնել են տարածք տրամադրել հայկական եկեղեցու կառուցման
համար, պարզապես անհամաձայնություն է առաջացել բնակիչների կողմից:
«Ես կարծում եմ, որ այդ հարցը կլուծվի, ուղղակի մի փոքր
համբերություն է հարկավոր: Դեսպանությունը անում է ամեն ինչ
աջակցելու այդ խնդրի լուծմանը»,- ասաց դեսպանը` միաժամանակ նշելով,
որ նման խնդիրներ կան բոլոր երկրներում, այդ թվում եւ Հայաստանում:
«Օրինակ` մեր դեսպանությունը երկար տարիներ դիմել եւ խնդրել է,
որպեսզի ուկրաինական դեսպանատան կառուցման համար Երեւանի
իշխանությունները տարածք տրամադրեն, այն էլ փոխշահավետ
պայմաններով: Ի վերջո հարցը լուծվեց այնպես, որ ուկրաինական կողմը
Երեւանում տուն գնեց դեսպանատան համար»,- ասաց դեսպանը:
Օլեքսանդր Բոժկոն համոզմունք հայտնեց, որ «կառուցվելիք
եկեղեցին լինելու է ոչ միայն հոգեւոր, այլեւ մշակութային կենտրոն
Ուկրաինայում բնակվող հայերի համար»: