ԵՐԵՎԱՆ, 9 ՓԵՏՐՎԱՐԻ, ՆՈՅՅԱՆ ՏԱՊԱՆ: Ազատ եւ հունահռոմեական ոճի ըմբշամարտի Հայաստանի ազգային հավաքականները գլխավոր մարզիչներ Հրանտ Ենոքյանի եւ Լեւոն Ջուլֆալակյանի ղեկավարությամբ լրջորեն նախապատրաստվում են սեպտեմբերին Բաքվում անցկացվելիք աշխարհի առաջնություններին: Այս մասին «ՆՈՅՅԱՆ ՏԱՊԱՆ»-ի թղթակցին հայտնեց ՀՀ Հայսպորտպետկոմի մամլո քարտուղար, Հայաստանի մարզական լրագրողների ֆեդերացիայի (ՀՄԼՖ) նախագահ Յուրի Արեքսանյանը: Նա նշեց, որ Ադրբեջանի «ԱՊԱ-Սպորտ» գործակալությունը փետրվարի 8-ին լուր է տարածել, թե իբր Հայաստանի ըմբշամարտի ֆեդերացիայի գլխավոր քարտուղար Յուրա Վարդանյանն հայտարարել է, որ Հայաստանի ըմբիշները հրաժարվել են Բաքվում կայանալիք մրցումներին մասնակցությունից: Սա, ըստ ՀՀ Հայսպորտպետկոմի մամլո քարտուղարի, Ադրբեջանի հերթական ապատեղեկատվությունն է, քանի որ Լ.Վարդանյանը երբեւիցե նման հայտարարություն չի արել:

---