ԵՐԵՎԱՆ, 5 ՓԵՏՐՎԱՐԻ, ՆՈՅՅԱՆ ՏԱՊԱՆ: Փետրվարի 5-ի լուսադեմին Անդորրա մեկնեց Հայաստանի ֆուտբոլի ազգային հավաքականը` գլխավոր մարզիչ, շոտլանդացի Յան Պորտերֆիլդի գլխավորությամբ: Փետրվարի 7-ին ՖԻՖԱ-ի օրացույցով ընկերական հանդիպումների օր է նշանակված: Այդ օրը Հայաստանի հավաքականը ուժերը կչափի Անդորրայի ընտրանու հետ: Նշենք, որ այս հանդիպմանը չեն մասնակցելու Իրանում գտնվող Ալեքսանդր Թադեւոսյանը, Աղվան Մկրտչյանը, Հոլանդիայի «Այաքս»-ի խաղացող Էդգար Մանուչարյանը եւ էլի մի քանիսը: Հայաստանի հավաքականի դարպասը կրկին կպաշտպանի փորձառու Ռոման Բերեզովսկին: Թիմակիցներին միացել է նաեւ պաշտպան Կարեն Դոխոյանը:

---