Հարյուրից ավելի սփյուռքահայ ճարտարապետներ արդեն իրենց
ներուժն են ներդնում Հայաստանում իրականացվող նախագծերում
28-10-2009 21:30:00 | Հայաստան | Հասարակություն
ԵՐԵՎԱՆ, 28 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Չինաստանի Շանհայ
քաղաքում հաջորդ տարի անցկացվելիք «EXPO-2010» միջազգային
ցուցահանդեսում Հայաստանը ներկայանալու է «Աշխարհի քաղաք» վիրտուալ
ծրագրով: Հայաստանի վարչապետի հանձնարարությամբ սփյուռքահայ
ճարտարապետներին արդեն իսկ առաջադրվել է ըստ եվրոպական, պարսկական,
ամերիկյան եւ այլ թաղամասերի քաղաք նախագծելու ծրագիր: Այս մասին
Ազգային ժողովի հերթական նիստում` «ՀՅԴ» խմբակցության անդամ
Ռուզաննա Առաքելյանի հարցին ի պատասխան, հայտնեց Հայաստանի
սփյուռքի նախարար Հրանուշ Հակոբյանը:
Նա տեղեկացրեց նաեւ, որ կառավարությունում կա գաղափար, բայց
ոչ վերջնական որոշում` «EXPO-2010»-ում այդ նախագծի հաջողության
դեպքում, քաղաքը կառուցել Հայաստանում` Մասիսի ստորոտում, Խոր
Վիրապի շրջակայքում: Միեւնույն ժամանակ նախարարը վստահեցրեց, որ
Աշխարհի քաղաք հիմնելու դեպքում որեւէ ճարտարապետական կամ
հնագիտական կառույցի վնասելու հավանականությունը կբացառվի: «Տա
Աստված, որ գա այդ օրը, եւ այդ քաղաքը կառուցվի` որպես շատ
հետաքրքիր գաղափար եւ նորույթ, որպես շնորհակալություն բոլոր այն
երկրներին, որոնք դռները բացել են եւ մեր հայ ժողովրդին ընդունել
են իրենց երկրներում»,- ասաց սփյուռքի նախարարը:
Նա տեղեկացրեց նաեւ, որ սփյուռքահայ 150 ճարտարապետների
ներուժը ներկայումս օգտագործվում է Հայրենիքի կողմից առաջադրված
այլ խնդիրներում եւս, մասնավորապես, Երեւան քաղաքի կառուցապատման
աշխատանքներում: Ըստ նրա, տարբեր երկրների հայ ճարտարապետներ
նախագծային առաջարկներ են ներկայացնում Հայաստանի
կառավարությանը: