ԵՐԵՎԱՆ, 23 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Արդեն պատրաստ է Հայաստանի Մարդու իրավունքների պաշտպան Արմեն Հարությունյանի արտահերթ զեկույցը, որը վերաբերում է արդար դատաքննության իրավունքին: Այն առաջիկա երկու շաբաթվա ընթացքում կներկայացվի հանրությանը: Հայտնելով այս մասին հոկտեմբերի 23-ի ասուլիսում, Պաշտպանը նշեց, որ բացարձակապես բավարարված չէ Հայաստանում արդար դատաքննության իրավունքի պաշտպանության վիճակով: Ի դեպ, Պաշտպանի հաստատության հետ չհամագործակցող մարմինների ցանկում առաջինը դատախազությունն է: Ա.Հարությունյանը գոհունակություն հայտնեց, որ ավելի քան մեկ տարվա գործունեությունից հետո հաջողվել է հասնել նրան, որ Լեռնային Ղարաբաղի Մարդու իրավունքների պաշտպանը դարձել է Եվրոպական օմբուդսմանի ինստիտուտի լիիրավ անդամ, իսկ ՀՀ Մարդու իրավունքների պաշտպանը` առաջին անգամ Հարավային Կովկասի պատմության մեջ, ընտրվել այդ մարմնի ղեկավար խորհրդի անդամ: Իր գլխավորած հաստատության գործունեության դրական արդյունքներից Ա.Հարությունյանը, մասնավորապես, նշեց 39 ընտանիքի` 105 հոգու, սեփականության իրավունքի վերականգնումը: Ըստ նրա, Երեւանի Հյուսիսային պողոտայի նախկին բնակիչների գործերը վերջիններիս համար հաջող ընթացք են ունենում: «Հյուսիսային պողոտան ժամանակին մի մեծ պրոյեկտ էր մարդկանց սեփականությունը շատ էժան գներով վերցնելու եւ դրա տակ քողարկված բիզնես անելու` հանրային շահերի անվան տակ»,- հայտարարեց Ա.Հարությունյանը: Հիշեցնելով, որ պողոտայի հուսալքված բնակիչներից մեկը հայտարարել էր, թե քաղաքական ապաստարան է խնդրելու Թուրքիայում, Պաշտպանը կոչ արեց սեփական իրավունքների համար պայքարել սեփական երկրում: Իսկ ինչ վերաբերում է Թուրքիային, ապա Ա.Հարությունյանը հայտնեց, որ Թուրքիան Եվրոպական դատարանում իր դեմ ամենաշատ վճիռներ եւ խախտումներ ունեցող երկրներից մեկն է: Բացի այդ, Թուրքիայում չկա մարդու իրավունքների պաշտպանի ինստիտուտ, եւ վերջերս միայն Թուրքիայի վարչապետը հայտարարել է, որ անհրաժեշտ է օր առաջ ստեղծել այդ ինստիտուտը:

---