Ամենայն Հայոց Կաթողիկոսն ընդունեց Լիբանանի «Սուրբ Էջմիածնի
Կրոնասեր Տիկնանց Համախմբումի» անդամներին
09-10-2009 21:00:00 | Հայաստան | Հասարակություն
ԷՋՄԻԱԾԻՆ, 9 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Գարեգին Բ Ծայրագույն
Պատրիարք եւ Ամենայն Հայոց Կաթողիկոսը հոկտեմբերի 9-ին հանդիպել է
Լիբանանի «Սուրբ Էջմիածնի Կրոնասեր Տիկնանց Համախմբումի»
անդամուհիների հետ, ովքեր եկել էին հրաժեշտ տալու Նորին
Սրբությանը:
Վեհափառ Հայրապետը վերստին իր գնահատանքն է հայտնել
ներկաներին` վստահություն հայտնելով, որ երջանկահիշատակ Վազգեն Ա
Հայրապետի հոգին այս պահին ուրախություն է ապրում եւ օրհնում
նրանց, որ համախումբ մեկտեղվել են Սուրբ Էջմիածնում եւ տոնախմբում
են միության հոբելյանը, որ ստեղծվեց հոգելույս Հայոց Հայրապետի
գահակալության շրջանում:
«Գնահատելի է Ձեր նվիրումը, սերը եւ հավատարմությունը հանդեպ
Մայր Աթոռ Ս. Էջմիածինը, որոնք երբեք չեն սասանվել եւ չեն
տկարացել: Մշտապես, բոլոր պարագաներում դուք քաջությամբ,
լավատեսության ոգով եւ առ Ս. Էջմիածինը հավատով իրականացրել եք ձեր
ծառայությունը` ջերմ պաշտպանը մնալով Ամենայն Հայոց Հայրապետության
եւ Մայր Աթոռ Սուրբ Էջմիածնի»,- ասել է Նորին Սրբությունը` նշելով,
որ բոլոր սերունդները գնահատանքով պիտի հիշեն Համախմբումի
անդամուհիների նվիրյալ ծառայությունը եւ սերը ժողովրդի, Հայոց
Եկեղեցու եւ Հայրենիքի հանդեպ:
Համախմբումի անդամները շնորհակալություն են հայտնել Նորին
Սրբության եւ Մայր Աթոռ Սուրբ Էջմիածնի հոգատար վերաբերմունքի եւ
ջերմ ընդունելության, ինչպես նաեւ մեկշաբաթյա հագեցած
ժամանակացույցի համար: