Գերմանիայում գործում է Սեւրուգյանների լուսանկարչական եւ
գեղանկարչական աշխատանքների ցուցահանդեսը
16-06-2009 17:45:00 | Գերմանիա | Մշակույթ
ՖՐԱՆԿՖՈՒՐՏ, 16 ՀՈՒՆԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Ֆրանկֆուրտի Համաշխարհային մշակույթների թանգարանում մի քանի ամիս
շարունակ գործում է իրանահայ դասական լուսանկարիչ Անտուան
Սեւրուգյանի եւ նրա որդու` գեղանկարիչ Անդրե Սեւրուգյանի (Դարվիշ)
աշխատանքների ցուցահանդեսը: 2008թ. դեկտեմբերի 6-ին բացված
«Սեւրուգյան կամ արեւելյան պատկերներ` լուսանկարով եւ
գեղանկարչությամբ, 1880-1980թթ.» խորագրով ցուցահանդեսը կգործի
մինչեւ 2009թ. հուլիսի 7-ը:
Ինչպես հաղորդում է «Մարմարա» օրաթերթը, բացի Անտուան
Սեւրուգյանի հեղինակած լուսանկարչական ապակիներից, ցուցադրանքում
ներկացված են Անդրե Սեւրուգյանի իրանական թեմաներով 90
գեղանկարչական աշխատանքները: Ցուցադրված նմուշները պատկանում են
Անտուան Սեւրուգյանի թոռանը` Էմմանուել Սեւրուգյանին:
Անտուան Սեւրուգյանը (1840-1933թթ.) եղել է 20-րդ դարասկզբի
Իրանի առաջավոր լուսանկարիչներից մեկը: Նրա աշխատանքներից
պահապանվել են շուրջ 2000 լուսանկարչական ապակիներ, իսկ մնացած
7000 գործերը, ցավոք, ոչնչացել են Իրանի Սահմանադրական շարժման
տարիներին: Նրա որդու` գեղանկարիչ Անդրե Սեւրուգյանի
(1894-1996թթ.) գործերը նույնպես ներկայացնում են իրանական եւ
հայկական թեմաներ: Անդրեի պարսկական թեմաներով մանրանկարների զգալի
մասը պահպանվում է Հնդկաստանում, իսկ հայկական թեմաներով մոմանկար
աշխատանքներից մեծ ժողովրդականություն է վայելում «Սայաթ Նովա»
շարքը: