Դրամատիկ արվեստների հայկական միության հայտարարած մրցույթի
եզրափակիչ է անցել 3 ֆիլմ
11-06-2009 18:59:00 | ԱՄՆ | Մշակույթ
ԼՈՍ ԱՆՋԵԼԵՍ, 11 ՀՈՒՆԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Դրամատիկ արվեստների հայկական միության (ԴԱՀՄ) հայտարարած «Lillian
and Varnum Paul 2009» (անցկացվում է 2 տարին մեկ անգամ) ֆիլմերի
մրցույթի եզրափակիչ փուլ են անցել երեք ֆիլմ` Էրիկ Նազարյանի (ԱՄՆ)
«Երաժշտություն օտարների համար», Լեւոն Մինասյանի (Ֆրանսիա)
«Մոսկվիչ, իմ սեր» եւ Դավիթ Դերանյանին եւ Անտոնի Զանոնթյանի (ԱՄՆ)
«Բեդվինը»: Այս մասին տեղեկացրել է ԴԱՀՄ-ն հունիսի 8-ի
հաղորդագրությամբ:
Մրցույթին մասնակցելու հայտեր էին ներկայացվել ֆիլմեր ԱՄՆ-ից,
Եվրոպայից եւ Հայաստանից: Պահանջների թվում էին սցենարների հիմքում
հայկական թեմատիկայի առկայությունը եւ անգլերեն գրված սցենարներ:
Եզրափակիչ փուլ հասած երեք ֆիլմերը կգնահատվեն պատվավոր
ժյուրիի կողմից, որի կազմում են կինոռեժիսոր Ատոմ Էգոյանը,
պրոդյուսեր, Alcon Entertainment-ի զարգացման գծով փոխնախագահ Սթիվ
Վեգները եւ ռեժիսոր Միշել Պերեցյանը:
Մրցույթի հաղթողը, ում անունը կհայտարարվի օգոստոսի 28-30-ը
Լոս Անջելեսում, կստանա 10 հազար դոլար:
Դրամատիկ արվեստների հայկական միության առաքելությունն է
Հայաստանի թատրոնի եւ կինոյի ձայնը աշխարհում լսելի դարձնելը, որը
կազմակերպությունը իրականացնում է` հնարավորինս աջակցելով
դրամատուրգներին, սցենարիստներին եւ ռեժիսորներին:
Բացի «Lillian and Varnum Paul» ֆիլմերի մրցույթից, ԴԱՀՄ-ն
նաեւ անցկացնում է Վիլյամ Սարոյանի անվան դրամատիկ գործերի
մրցույթ: Հայտերի ընդունման վերջնաժամկետը 2010թ. փետրվարի 15-ն է:
Լրացուցիչ տեղեկությունների համար կարելի է այցելել
www.armeniandrama.org կայքը: