Երեւանում բացվեց հայազգի 15 լուսանկարիչների ցուցահանդես եւ
ներկայացվեց Վ.Քոչարի «Հայ լուսանկարիչներ» պատկերագիրքը
20-04-2009 21:00:00 | Հայաստան | Մշակույթ
ԵՐԵՎԱՆ, 20 ԱՊՐԻԼԻ, ՆՈՅՅԱՆ ՏԱՊԱՆ: Երեւանում, Հայաստանի
Գիտությունների ազգային ակադեմիայի պատկերասրահում ՀՀ սփյուռքի
նախարարության հովանավորությամբ ապրիլի 20-ին բացվեց հայազգի 15
ճանաչված լուսանկարիչների ցուցահանդես, որի ընթացքում ներկայացվեց
նաեւ հայտնի լուսանկարիչ Վահան Քոչարի «Հայ լուսանկարիչներ»
պատկերագիրքը: Ինչպես ցուցահանդեսի բացման խոսքում նշեց ՀՀ
սփյուռքի նախարար Հրանուշ Հակոբյանը, Վահան Քոչարի կազմած
պատկերագիրքը հանրագիտարանային եւ տեղեկատվական մեծ նշանակություն
ունի: Ըստ նախարարի, այդ գրքով Վ.Քոչարը հիմք է դրել նաեւ հայ
լուսանկարիչների միջեւ կապի ստեղծմանը: Նախարարը նաեւ շնորհավորեց
արվեստագետին իր 60-ամյակի կապակցությամբ:
Շնորհակալություն հայտնելով նման ցուցահանդես նախաձեռնելու
համար, Վահան Քոչարը նշեց, որ այդպիսով իր հոր` անվանի
լուսանկարիչ Անդրանիկ Քոչարի, երազանքը իրականություն դարձավ:
Այսպիսով, Ա.Քոչարն ավարտեց իր հոր սկսած գործը` տպագրելով
աշխարհասփյուռ հայ լուսանկարիչներին նվիրված պատկերագիրքը: Այժմ
նախապատրաստվում է գրքի լրացված անգլերեն երկհատոր տարբերակը:
Ինչպես նշված է ՀՀ Սփյուռքի նախարարության տարածած մամլո
հաղորդագրության մեջ, «Հայ լուսանկարիչներ» բառարանային
պատկերագիրքը լույս է տեսել 2007թ. վերջին 488 էջով եւ 1000
տպաքանակով Հայաստանի նախկին վարչապետ Անդրանիկ Մարգարյանի
հովանավորությամբ: Գիրքն ամբողջական հանրագիտարան է սփյուռքի եւ
հայրենիքի լուսանկարչական ժառանգության, որ մինչ օրս հավուր
պատշաճի չի ներկայացվել հայ հանրությանը: Գրքում նշված է մոտ 480
հայ լուսանկարչի անուն: Նրանցից 300-ը ներկայացված են իրենց
կենսագրականներով եւ լուսանկարներով, իսկ 180-ի անունները
հայտնաբերվել եւ զետեղվել են տարբեր լուսանկարչական կնիքների եւ
ծրարների վրա: Գրքում զետեղված են համաշխարահային հռչակ ստացած
այնպիսի լուսանկարիչների անուններ, ինչպիսիք են կանադահայեր
Յուսուֆ Քարշը, Արթո Գավուքը, պոլսահայ Արա Գյուլերը, ամերիկահայ
Հարրի Քունդակչյանը եւ շատ ուրիշներ: Այս աշխատանքով Վահան Քոչարը
փաստորեն առաջին փորձն է արել ամբողջացնելու հայ լուսանկարչական
արվեստի պատմությունը:
Վահան Քոչարը ծնվել է 1949 հունվարի 25 Երեւանում: Նրա հայրը`
հայտնի լուսանկարիչ Անդրանիկ Քոչարը եգիպտահայ է, ով 1947 թվականին
հայրենադարձել է Հայաստան: Վահան Քոչարը ավարտել է Կոջոյանի անվան
նկարչական դպրոցը եւ Աբովյանի անվան մանկավարժական ինստիտուտը:
ԽՍՀՄ ժուռնալիստների միության անդամ է: «Թանգարան» գրքի համար 1998
Ֆրանկֆուրտի միջազգային ցուցահանդեսում արժանացել է ՅՈՒՆԵՍԿՕ-ի
մրցանակին: Ռազմիկ Դավոյանի «Ոգեղեն հաց» գրքի համար 2002 թ.
արժանացել է հայ գրահրատարակիչների մրցանակին: Վերջին
տասնամյակների ընթացքում Հայաստանում հրատարակված բազմաթիվ հայ
նկարիչների պատկերագրքերի գեղարվեստական խմբագիրն է ու նկարիչը: