ՀՀ ՆԱԽԱԳԱՀՆ ԱՌԱՋԱՐԿԵԼ Է ՄԱՅՐԱՔԱՂԱՔԻ ՏԱՐԲԵՐ ՀԱՏՎԱԾՆԵՐՈՒՄ
ԿԱՌՈՒՑԵԼ ՓՈՔՐԱԾԱՎԱԼ ԱՌԵՎՏՐԻ ԿԵՆՏՐՈՆՆԵՐ
22-01-2007 17:28:00 | Հայաստան | Հասարակություն
ԵՐԵՎԱՆ, 22 ՀՈՒՆՎԱՐԻ, ՆՈՅՅԱՆ ՏԱՊԱՆ: Թեեւ Երեւանի
քաղաքապետարանը մի քանի տարի է բոլոր միջոցները ձեռնարկում է
փողոցային առեւտրի կանոնակարգման ուղղությամբ, այդուհանդերձ այդ
աշխատանքները դեռեւս թերի են: Ինչպես հունվարի 22-ի ասուլիսում
հայտնեց քաղաքապետարանի Առեւտրի եւ սպասարկման վարչության պետ
Կարեն Գեւորգյանը, քաղաքացիները դեռ չեն գիտակցում, որ փողոցում
վաճառվող մթերքը վտանգավոր է առողջության համար, եւ այն իրացվում է
սանիտարահիգիենիկ նորմերին չհամապատասխանող պայմաններում:
Ըստ նրա, ՀՀ նախագահի կարգադրությամբ հանձնարարվել է լուրջ
ուշադրություն դարձնել Երեւանի փողոցներում տաղավարների
տեղակայմանը եւ արտաքին տեսքին: Ռ.Քոչարյանը նաեւ առաջարկել է
մայրաքաղաքի տարբեր հատվածներում կառուցել փոքրածավալ առեւտրի
կենտրոններ:
Կ.Գեւորգյանը հայտնեց, որ քաղաքապետարանը բնակչությունից
բազմաթիվ բողոքներ է ստանում` բնակելի շենքերի նկուղներում գործող
հացաթխման արտադրամասերի, քիմմաքրման կետերի, բաղնիք-սաունաների եւ
այլ օբյեկտների վերաբերյալ: Նշվեց, որ բնակիչների բողոքները
հիմնականում արդարացի են, քանի որ շենքերի նկուղներում նման
օբյեկտների գործունեությունը օրենքով չի թույլատրվում: Այդ
նպատակով, 2007թ.-ի հունվարի 1-ից Երեւանի քաղաքապետարանը գրավոր
զգուշացումներ է ուղարկում նմանատիպ օբյեկտների սեփականատերերին,
որպեսզի նրանք վերանայեն իրենց գործունեության տեսակը եւ այն փոխեն
մեկ այլ գործունեության: Եթե 2 ամսվա ընթացքում այդ ուղղությամբ
սեփականատերերը աշխատանքներ չտանեն, ապա քաղաքապետարանը կդիմի
դատարան:
Վարչության պետը անդրադարձավ նաեւ հասարակական զուգարանների
խնդրին: Ըստ Կ.Գեւորգյանի, անցած տարի քաղաքապետի որոշմամբ դրանց
կառուցման նպատակով կատարվել է 7 հողահատկացում, իսկ այս տարի` 50
հողահատկացում: