ԴԵԿՏԵՄԲԵՐԻ ՍԿԶԲԻՆ ԻՏԱԼԱԿԱՆ ԶՈՐՔԵՐԸ ԻՐԱՔԻՑ ԼՐԻՎ ԴՈՒՐՍ
ԿԲԵՐՎԵՆ
27-11-2006 20:12:00 | Իտալիա | Միջազգային
ՀՌՈՄ, 27 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Իտալիայի վարչապետ Ռոմանո
Պրոդին երկուշաբթի հայտարարել է, որ բոլոր իտալացի զինվորները
դեկտեմբերի սկզբին կհեռանան Իրաքից:
Ինչպես հաղորդում է «Նովոստի» գործակալությունը, ըստ Պրոդիի,
գործնականորեն իտալական ողջ խաղաղապահ զորակազմը արդեն դուրս է
բերված այդ երկրի տարածքից «մասամբ օդով, մասամբ ծովով` ռազմական
տեխնիկայի հետ միասին» եւ այժմ գտնվում է Քուվեյթում: Իրաքում
առայժմ մնում են 60-70 մարդ, որոնք զորանոցներն են հանձնում տեղի
ոստիկանությանը:
«Բայց եւ նրանք կվերադառնան դեկտեմբերի առաջին օրերին»,-
ընդգծել է Պրոդին:
«Այս մասին ես խոսել եմ Բուշի հետ: Նա ասաց, որ շատ է
ափսոսում, որ իտալացիները թողնում են Իրաքը, սակայն գիտեր, որ դա
լինելու է, քանի որ նախընտրական արշավի ժամանակ դա խոստացվել էր
ընտրողներին»,- ասել է Իտալիայի վարչապետը: