ՄՈՍԿՎԱՅՈՒՄ ԲԱՑՎԵՑ ՀԱՅ ՄԵԾ ԿՈՄՊՈԶԻՏՈՐ ԱՐԱՄ ԽԱՉԱՏՐՅԱՆԻ
ՀՈՒՇԱՐՁԱՆԸ
31-10-2006 20:15:00 | Ռուսաստան | Միջազգային
ՄՈՍԿՎԱ, 31 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Երեքշաբթի Մոսկվայի
կենտրոնում` Բրյուսովի նրբանցքում Կոմպոզիտորների տան մերձակա
պուրակում բացվեց աշխարհահռչակ կոմպոզիտոր Արամ Խաչատրյանի
հուշարձանը: Հուշարձանի բացման հանդիսավոր արարողությանը
մասնակցեցին ՌԴ նախագահի տիկին Լյուդմիլա Պուտինան, Հայաստանի
նախագահ Ռոբերտ Քոչարյանը եւ Մոսկվայի քաղաքագլուխ Յուրի Լուժկովը:
Բրոնզե հուշարձանը տեղադրվել է ոչ հեռու այն տնից, որտեղ ապրել եւ
աշխատել է մեծ կոմպոզիտորը, որի երաժշտությունը հայտնի է ողջ
աշխարհում: Քանդակագործ Գեորգի Ֆրանգուլյանը եւ ճարտարապետ Իգոր
Վոսկրեսենսկին մաեստրոյին պատկերել են ստեղծագործական ներշնչանքի
պահին` երաժշտական գործիքների շրջապատում:
«Շատ խորհրդանշական է, որ հուշարձանը գտնվում է այս վայրում`
կոնսերվատորիայից եւ Կոմպոզիտորների տնից ոչ հեռու»,- հանդիսության
ժամանակ ասաց Լյուդմիլա Պուտինան: Նա ընդգծեց, որ քանդակագործներին
«հաջողվել է իրենց ստեղծագործությամբ հաղորդել կոմպոզիտորի եւ իր
երաժշտության բնույթն ու ոգին»: «Հուշարձանը խորհրդանշում է մեր
ժողովուրդների բարեկամությունը, եւ վստահ եմ, որ նրա պատվանդանին
միշտ կենդանի ծաղիկներ կլինեն, նույնքան վառ, ինչպիսին նրա
երաժշտությունն է»,- համոզված է Լյուդմիլա Պուտինան:
Հայաստանի նախագահ Ռոբերտ Քոչարյանը, որը հանդիսությանը եկել
էր տիկնոջ հետ, նշեց, որ Խաչատրյանի կյանքը, նրա ճակատագիրը եւ
ստեղծագործությունը «մեր ժողովուրդների ճակատագրերի միահյուսման
փայլուն օրինակ է»: «Շատ նշանակալի է, երբ մարդը միատեսակ սիրելի է
եւ յուրային է համարվում ինչպես Հայաստանում, այնպես էլ
Ռուսաստանում»,- նկատեց նա` նույնպես մատնանշելով այն վայրի
ընտրությունը, որտեղ դրվել է հուշարձանը. «Շուրջբոլորն ամեն բան
կապված է երաժշտության հետ, եւ շատ կարեւոր է, որպեսզի Խաչատրյանի
կերպարը մեզ բոլորիս հիշեցնի մեր ժողովուրդների երջանիկ ապագայի
մասին»: Հայաստանի ղեկավարի հետ միասին հուշարձանի կարմիր ժապավենը
կտրած քաղաքապետ Յուրի Լուժկովը ընդգծեց, որ Խաչատրյանի հուշարձանը
բացվում է ռուսաստանցիների եւ հայերի համար նշանավոր տարում`
Ռուսաստանում Հայաստանի տարում, «երբ մենք լուծում ենք մեր
քաղաքացիների միջեւ հոգեւոր, քաղաքական շփման խնդիրները»,-
հաղորդում է «Նովոստի» գործակալությունը: