ԻԼՀԱՄ ԱԼԻԵՎ. «ՀԱՅԱՍՏԱՆԻ ԴԻՐՔՈՐՈՇՈՒՄԸ ՀԻՄՆՎԱԾ Է
ՑԱՆԿՈՒԹՅՈՒՆՆԵՐԻ, ՍՊԱՍԵԼԻՔՆԵՐԻ ԵՎ ԵՐԱԶԱՆՔՆԵՐԻ ՎՐԱ»
30-10-2006 17:21:00 | Ադրբեջան | Միջազգային
ԲԱՔՈՒ, 30 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: «Այժմ ղարաբաղյան
հակամարտության կարգավորման բանակցային գործընթացը տեղի է ունենում
այսպես կոչված Պրահյան ձեւաչափով, որը կարող է հնարավորություններ
ստեղծել նրա խաղաղ լուծման համար»: Այս մասին Ադրբեջանի նախագահ
Իլհամ Ալիեւը հայտարարել է Ռուսաստանում հավատարմագրված մի շարք
ԶԼՄ-ների տված հարցազրույցի ժամանակ: Ըստ նրա, կանխավ դժվար է
խոսել բանակցային գործընթացի ապագայի մասին, քանի որ
բանակցությունները շարունակվում են տասը տարուց ավելի եւ որեւէ
արդյունք չեն տվել: Դրա պատճառը, ըստ Իլհամ Ալիեւի, Հայաստանի ոչ
կառուցողական դիրքորոշումն է, որը խախտում է միջազգային
իրավաբանական նորմերը:
«Ադրբեջանի դիրքորոշումը հենվում է համաշխարհային հանրության
կողմից ճանաչված միջազգային նորմերի եւ սկզբունքների վրա:
Ադրբեջանի տարածքային ամբողջականությունը բանակցությունների առարկա
չէ: Հայաստանը պետք է անհապաղ եւ առանց նախապայմանների ազատի
Ադրբեջանի տարածքները, ինչ պատվիրում են ՄԱԿ Անվտանգության խորհրդի
չորս բանաձեւերը: Դա հիմնական սկզբունքն է, որ անվերապահ
պաշտպանում է Ադրբեջանը: Իսկ Հայաստանի դիրքորոշումը հիմնվում է իր
ցանկությունների, սպասելիքների եւ երազանքների վրա: Այն հիմնվում է
«կատարված փաստի» սկզբունքի վրա: Նրանք համարում են, որ միայն
արտասահմանյան աջակցությունն է նրանց հիմքեր տալիս մտածելու
Լեռնային Ղարաբաղի հողերը Ադրբեջանից անջատելու եւ Հայաստանին
միացնելու մասին, որ նրանք զավթել են մարտական գործողությունների
ժամանակ ժամանակավոր առավելության հետեւանքով: Ուստի Հայաստանի
ղեկավարությունը պետք է հստակ հասկանա, որ Ադրբեջանը ոչ մի զիջման
չի գնա իր տարածքային ամբողջականության առնչությամբ»,- հայտարարել
է նախագահը:
Ըստ Իլհամ Ալիեւի, Ադրբեջանն արդեն առաջարկել է այն ամենն,
ինչի կարող է գնալ: Խոսքը Լեռնային Ղարաբաղի հայերին եւ Լեռնային
Ղարաբաղ վերադարձած ադրբեջանցիներին աշխարհում գործնականում առկա
ինքնավարության բարձր կարգավիճակ տրամադրելու մասին է:
«Ինքնավարությունների առումով կա դրական համաշխարհային պրակտիկա:
Ազգային փոքրամասնությունների հարցի առկայությունը չի նշանակում
դուրս գալ մի պետության կազմից եւ ուրիշ պետության ստեղծում:
Հատկապես եթե հաշվի առնենք, որ շատ երկրներում են հայեր ապրում,
պատկերացրեք, թե ինչ տեղի կունենա, եթե նրանք սկսեն անկախություն
պահանջել: Սա մեր կառուցողական դիրքորոշումն է եւ սա առավելագույնն
է, ինչին մենք կարող ենք գնալ»,- ասել է Ալիեւը:
«Դժվար է նախապես ասել, թե ինչ կկատարվի բանակցությունների
անարդյունավետության դեպքում: Ծայրահեղ դեպքում, եթե
բանակցությունների այս փուլը ավարտվի ապարդյուն, ապա Ադրբեջանը
անպատճառ նորից կվերանայի իր ռազմավարությունը եւ
մարտավարությունը»,- նկատել է Իլհամ Ալիեւը: Այս մասին հաղորդում է
«Թրենդը»: