ԻԼՀԱՄ ԱԼԻԵՎ. ԱԴՐԲԵՋԱՆԸ ՉԻ ՊԱՇՏՊԱՆԻ ԻՐԱՆԻ ՆԿԱՏՄԱՄԲ
ՊԱՏԺԱՄԻՋՈՑՆԵՐԸ
30-10-2006 14:42:00 | Ադրբեջան | Միջազգային
ԲԱՔՈՒ, 30 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Իրանի միջուկային
ծրագրին առնչվող բոլոր վիճելի հարցերը պետք է լուծվեն
բանակցությունների ուղիով: Այս մասին, ինչպես հաղորդում է
«Թրենդը», հայտարարել է Ադրբեջանի նախագահ Իլհամ Ալիեւը
Ռուսաստանում հավատարմագրված արտասահմանյան մի շարք ԶԼՄ-ների տված
հարցազրույցի ժամանակ: «Կարծում եմ, որ դա միակ ուղին է այդ հարցի
խաղաղ լուծման եւ տարածաշրջանում փխրուն կայունության պահպանման
համար»,- ասել է նա: Ալիեւի կարծիքով, միջուկային ծրագրին առնչվող
խնդրի լուծման համար պետք է օգտագործվեն միջազգային հանրության
բոլոր հնարավորությունները: Ըստ նրա, Ադրբեջանը չի պաշտպանի
պատժամիջոցները Իրանի նկատմամբ, քանի որ դրանք չեն հանգեցնի հարցի
լուծման, այլ միայն կշիկացնեն իրադրությունը տարածաշրջանում: «Մենք
լավ հարաբերություններ ունենք Իրանի հետ, որին սահմանակից ենք
ավելի քան հազար կիլոմետր տարածքի վրա: Ուստի մենք շատ մտահոգված
ենք նրանով, որ իրադրությունը շիկացնելու ներունակ ցանկացած քայլ
կարող է մեծ ազդեցություն գործել տարածաշրջանային զարգացման վրա»,-
ասել է Ալիեւը: