ԹԲԻԼԻՍԻՈՒՄ ԱՇԽԱՏԱՆՔՆ Է ՍԿՍԵԼ «ԱՋԱԿՑՈՒԹՅՈՒՆ ԵՎՐՈՊԱԿԱՆ
ՀԱՐԵՎԱՆՈՒԹՅԱՆ ՔԱՂԱՔԱԿԱՆՈՒԹՅԱՆՆ ԱՌՆՉՎՈՂ ՏԱՐԱԾԱՇՐՋԱՆԱՅԻՆ
ԵՐԿԽՈՍՈՒԹՅԱՆԸ» ՀԱՄԱԺՈՂՈՎԸ
26-10-2006 15:45:00 | Վրաստան | Միջազգային
ԹԲԻԼԻՍԻ, 26 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հոկտեմբերի 26-ին
Թբիլիսիում աշխատանքն է սկսել «Աջակցություն Եվրոպական
հարեւանության քաղաքականությանն առնչվող տարածաշրջանային
երկխոսությանը» երկօրյա համաժողովը: Համաժողովը կազմակերպվել է
«Եվրասիա» ֆոնդի հովանավորությամբ Հարավկովկասյան
համագործակցության ծրագրի շրջանակում:
Համաժողովին ներկա են Ադրբեջանի, Հայաստանի եւ Վրաստանի
կառավարությունների, քաղաքացիական հասարակության եւ ոչ կառավարական
սեկտորի, միջազգային կազմակերպությունների եւ դիվանագիտական
կորպուսի ներկայացուցիչներ: Համաժողովի մասնակիցները կհստակեցնեն
Եվրոպական հարեւանության քաղաքականության շրջանակում
տարածաշրջանային համագործակցության հնարավոր ուղղությունները:
Հանդիպման ընթացքում կքննարկվեն նաեւ իշխանությունների եւ
քաղաքացիական հասարակության միջեւ երկխոսության մեխանիզմների
բարելավման հնարավորությունները Հարավային Կովկասում: Համաժողովը
կազմակերպվել է «Քաղաքացիական սեկտորի ներգրավում եվրաինտեգրացման
գործընթացում» ֆոնդի նոր նախագծի առաջին փուլի շրջանակում: Նախագծի
շրջանակում կանցկացվի երեք տարածաշրջանային ֆորում եւ կհրապարակվեն
եռակողմ վերլուծաբանական հաշվետվություններ: Հետազոտությունները
նախագծի շրջանակում կիրականացնեն Հարավային Կովկասի երկրների
քաղաքացիական կազմակերպությունների գործընկերական խմբերը: