ՄՈՍԿՎԱՅՈՒՄ ՇԱՐՈՒՆԱԿՎՈՒՄ ԵՆ ԱՆԼԵԳԱԼՆԵՐԻ ԶԱՆԳՎԱԾԱՅԻՆ
ՍՏՈՒԳՈՒՄՆԵՐԸ
24-10-2006 11:55:00 | Ռուսաստան | Միջազգային
ՄՈՍԿՎԱ, 24 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Մոսկվայում եւ
Պոդմոսկովիեում շարունակվում են զանգվածային ստուգումները:
Երկուշաբթի հայտնի է դարձել, որ իրավապահ մարմինները մասշտաբային
ստուգայց են իրականացրել մայրաքաղաքի Արեւմտյան օկրուգի պարենային
շուկաներից մեկում: Ստուգայցի ընթացքում ձերբակալվել են մոտ
հարյուր միգրանտներ Տաջիկստանից, Վրաստանից, Մոլդավիայից,
Ուզբեկստանից եւ ԱՊՀ այլ երկրներից: Միեւնույն ժամանակ
Պոդմոսկովիեի իշխանությունները խոստանում են փակել 15 շուկաներ, որ
գտնվում են մարզի տարածքում:
Զանգվածային ստուգումները Մոսկվայում եւ մարզերում սկսվեցին
այն բանից հետո, երբ ՌԴ նախագահ Վլադիմիր Պուտինը կառավարության
ղեկավար Միխայիլ Ֆրադկովին հանձնարարեց կարգուկանոն հաստատել
շուկաներում, հայրենական արտադրողին պաշտպանել ռեկետից եւ խստացնել
այցագրային կարգը: Պուտինը հայտարարեց, որ մինչեւ նոյեմբերի 15-ը
պետք է ընդունվեն նորմատիվ ակտեր` արտասահմանյան աշխատողներին
ՌԴ-ում աշխատանքային գործունեության մեջ ներգրավելու կարգի մասին,
ապահովել աշխատանքային ռեսուրսների օպտիմալ հավասարակշռություն եւ
առաջնահերթ կարգով աջակցել ՌԴ քաղաքացիների աշխատանքի
տեղավորմանը,- հաղորդում է ԻՏԱՌ-ՏԱՍՍ-ը: