ԹԵԼ ԱՎԻՎ, 23 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Իսրայելի
առողջապահության նախարարությունը դադարեցրել է գրիպի դեմ
պատվաստումները, քանի դեռ չի պարզվել այն չորս մարդկանց մահվան
պատճառը, որոնք վախճանվել են ներարկումներից շատ չանցած, հաղորդում
է տեղական ռադիոն:
Առողջապահության նախարարությունը ընդգծում է, որ առայժմ
հիմքեր չկան պնդելու, որ մահվան պատճառ է դարձել հենց հակագրիպային
պատվաստանյութը: Վախճանված տղամարդիկ եղել են 53-ից 76 տարեկան,
նրանք բոլորը տառապում էին ծանր խրոնիկական հիվանդություններով:
Հետաքննության արդյունքները, որին միացել է ներարկանյութն
արտադրող ընկերությունը, սպասվում են երկուշաբթի օրվա ընթացքում,
որից հետո կքննարկվի պատվաստաումների վերականգնման հնարավորության
հարցը: