ԿՈԻՏԻՐՈ ՄԱՑՈՒՈՒՐԱ. ՅՈՒՆԵՍԿՕ-ՈՒՄ ԲԱՐՁՐ ԵՆ ԳՆԱՀԱՏՈՒՄ
ԱԴՐԲԵՋԱՆԻ ԱՎԱՆԴԸ ՀԱՄԱՇԽԱՐՀԱՅԻՆ ՄՇԱԿՈՒԹԱՅԻՆ ԺԱՌԱՆԳՈՒԹՅԱՆ
ՊԱՀՊԱՆՄԱՆ ՄԵՋ
20-10-2006 19:00:00 | Ադրբեջան | Միջազգային
ԲԱՔՈՒ, 20 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: ՅՈՒՆԵՍԿՕ-ում բարձր են
գնահատում Ադրբեջանի ավանդը համաշխարհային մշակութային
ժառանգության պահպանման գործում: Այս մասին Փարիզում անցկացվող
«Ադրբեջան. քաղաքակրթությունների եւ մշակույթների խաչմերուկ»
փառատոնում հայտարարել է այդ կազմակերպության գլխավոր տնօրեն
Կոիտիրո Մացուուրան:
Ինչպես հաղորդում է «Թրենդը»` վկայակոչելով ԻՏԱՌ-ՏԱՍՍ-ին,
միջազգային կազմակերպության ղեկավարը առանձնացրել է հանրապետության
բարեփոխումները կրթության բնագավառում, Մետաքսի մեծ ճանապարհի
վերականգնման, Մուղամի համաշխարհային կենտրոնի ստեղծման
աշխատանքները: «Ես լիովին բավարարված եմ, թե ինչպես են զարգանում
հարաբերությունները,- ասել է Կոիտիրո Մացուուրան:- Դա
համագործակցության լավ օրինակ է»: Նա նշել է, որ մտադիր է նորից
այցելել Բաքու:
Հանրապետության հումանիտար ոլորտի նախագծերը Փարիզում
ներկայացրել է ՅՈՒՆԵՍԿՕ-ի բարի կամքի դեսպան Մեհրիբան Ալիեւան: Նա
պատմել է երեխաների պաշտպանության, փախստականներին ցուցաբերվող
աջակցության, հասարակության մեջ հանդուրժողականության դաստիարակման
ծրագրերի մասին: «Մեր երկիրը կիսում է ունիվերսալ արժեքները,-
ընդգծել է Ադրբեջանի առաջին տիկինը:- Մենք գիտենք, թե ուր ենք
գնում»: