ՀՀ ՆԱԽԱԳԱՀԻ ԽՈՐՀՐԴԱԿԱՆԸ ՆՇՈՒՄ Է ՄԻՋՀԱՄԱՅՆՔԱՅԻՆ ԿԱՌԱՎԱՐՄԱՆ
ԻՆՍՏԻՏՈՒՏԻ ՍՏԵՂԾՄԱՆ ԱՆՀՐԱԺԵՇՏՈՒԹՅՈՒՆԸ
20-10-2006 14:10:00 | Հայաստան | Հասարակություն
ԵՐԵՎԱՆ, 20 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: «Այսօր Հայաստանում
սրությամբ ծառացած է տեղական ինքնակառավարման մարմինների փոշիացման
խնդիրը»: Այս մասին հոկտեմբերի 20-ին Ֆ.Էբերտի անվան ֆոնդի
աջակցությամբ «Եվրոպական ինտեգրացում» ՈԿԿ-ի կազմակերպած
սեմինարում, որը նվիրված էր տեղական ինքնակառավարման բնագավառի
եվրոպական փորձին, հայտարարեց ՀՀ նախագահի խորհրդական Սեյրան
Ավագյանը:
Ըստ նրա, եթե, օրինակ, Լիտվայում տեղական ինքնակառավարման
ընդամենը 64 մարմին է, ապա Հայաստանում դրանք 900-ն են, ընդ որում
որոշ համայնքներում ապրում է ընդամենը 50 կամ 100 մարդ: Այս
հանգամանքը, Ս.Ավագյանի կարծիքով, խոչընդոտում է համայնքների
արդյունավետ կառավարմանը: Այդ առումով կարեւոր նշանակություն է
ձեռք բերում միջհամայնքային կառավարման խնդրի լուծումը: Նա նշեց,
որ կարեւորագույն խնդիրներից մեկն է մնում նաեւ Երեւանի
կարգավիճակի սահմանումը:
Նախագահի խորհրդականը հույս հայտնեց, որ ընդունված
սահմանադրական փոփոխությունները նոր հնարավորություններ եւ
ռեսուրսներ կստեղծեն, որոնց շնորհիվ հնարավոր կդառնա երկու այդ
խնդիրների լուծումը:
Չնայած չլուծված խնդիրներին, ըստ Ս.Ավագյանի, Հայաստանի
օրենսդրական դաշտը, որը կարգավորում է տեղական ինքնակառավարման
ոլորտի գործունեությունը, գրեթե ձեւավորված է: