ՎՐԱՍՏԱՆԻ ՆԱԽԱԳԱՀԸ ՊԱՏՐԱՍՏ Է ՎԵՐՍԿՍԵԼ ՌՈՒՍԱՍՏԱՆԻ ՀԵՏ
ԵՐԿԽՈՍՈՒԹՅՈՒՆԸ ԲՈԼՈՐ ՄԱԿԱՐԴԱԿՆԵՐՈՒՄ
20-10-2006 14:00:00 | Վրաստան | Միջազգային
ԹԲԻԼԻՍԻ, 20 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Վրաստանի նախագահ
Միխայիլ Սահակաշվիլին հայտարարել է, որ բոլոր մակարդակներում
պատրաստ է վերականգնել երկխոսությունը Ռուսաստանի հետ:
«Մենք պատրաստ ենք վերականգնել Ռուսաստանի հետ երկխոսությունը
բոլոր մակարդակներում: Ես պատրաստ եմ արտաքին գործերի նախարար
Բեժուաշվիլուն նոյեմբերի 1-ին ուղարկել Մոսկվա մասնակցելու
Սեւծովյան ավազանի երկրների տնտեսական համագործակցության
կազմակերպության ԱԳՆ ղեկավարների հանդիպմանը, որտեղ նա կհանդիպի
Ռուսաստանի արտաքին գործերի նախարարի հետ: Ես պատրաստ եմ ցանկացած
ժամանակ հանդիպել Ռուսաստանի նախագահի հետ»,- հինգշաբթի երեկոյան
մամլո ասուլիսում ասել է Սահակաշվիլին:
Նա ընդգծել է, որ կմասնակցի ԱՊՀ պետությունների ղեկավարների
առաջիկա գագաթնաժողովին, քանի որ Վրաստանը չի հրաժարվում ցանկացած
հրապարակային ամբիոն օգտագործելուց, հաղորդում է «Նովոստի»
գործակալությունը: