ՍԵՐԳԵՅ ԻՎԱՆՈՎ. ՌՈՒՍԱՍՏԱՆԸ ՉԻ ՊԱՏՐԱՍՏՎՈՒՄ ԱՆԵՔՍԻԱՅԻ ԵՆԹԱՐԿԵԼ
ԱՅՍՊԵՍ ԿՈՉՎԱԾ «ՍԱՌԵՑՎԱԾ ՀԱԿԱՄԱՐՏՈՒԹՅՈՒՆՆԵՐԻ» ՏԱՐԱԾՔՆԵՐԸ
11-10-2006 17:00:00 | Ռուսաստան | Միջազգային
ՄՈՍԿՎԱ, 11 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Ռուսաստանը չի
պատրաստվում անեքսիայի ենթարկել այսպես կոչված «սառեցված
հակամարտությունների» տարածքները, հայտարարել է ՌԴ փոխվարչապետ, ՊՆ
ղեկավար Սերգեյ Իվանովը: «Մենք չենք պատրաստվում անեքսիայի
ենթարկել այդ տարածքները, դրանք միացնել Ռուսաստանի կազմին»,-
հոկտեմբերի 10-ին լրագրողներին ասել է Իվանովը: Միեւնույն ժամանակ,
ընդգծել է նախարարը, Ռուսաստանը պատասխանատվություն է կրում այնտեղ
ապրող իր քաղաքացիների անվտանգության համար: «Այնպես է ստացվել, որ
այդ տարածքներում ապրում են մոտ 90% Ռուսաստանի քաղաքացիներ` մեր
քաղաքացիները, եւ մենք նրանց համար պատասխանատվություն ենք կրում:
Այդ թվում եւ անվտանգության համար»,- ասել է նախարարը: «Այդ մարդիկ
երբեք չեն եղել Մոլդավիայի կամ Վրաստանի քաղաքացիներ: Նրանք եղել
են Խորհրդային Միության քաղաքացիներ: Միջազգային եւ հումանիտար
իրավունքի բոլոր նորմերին համապատասխան նրանք հնարավորություն
ունեին ընտրելու իրենց քաղաքացիություն»,- ասել է Իվանովը: «Այն,
որ նրանք ընտրել են Ռուսաստանի քաղաքացիություն, եւ բոլորին
հասկանալի է, թե ինչու են նրանք դա արել: Բայց ոչ ոք նրանց չի
ստիպել դա անել, եւ ոչ մի անձնագրերի բաժանում չի եղել»,- ասել է
նա` նշելով, որ յուրաքանչյուրն անհատապես գրել է համապատասխան
դիմում: