«ՏԵՄՊՈՒՍ-ՏԱՍԻՍ»-Ի ՇՐՋԱՆԱԿՆԵՐՈՒՄ ՀԱՅԱՍՏԱՆՈՒՄ ԻՐԱԿԱՆԱՑՎՈՒՄ Է
28 ԾՐԱԳԻՐ
10-10-2006 17:50:00 | Հայաստան | Հասարակություն
ԵՐԵՎԱՆ, 10 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Եվրամիության կողմից
ԱՊՀ երկրներին կրթական ոլորտում աջակցության «ՏԵՄՊՈՒՍ-ՏԱՍԻՍ»
ծրագրի շնորհիվ հայաստանյան մի շարք բուհեր համագործակցում են Մեծ
Բրիտանիայի, Ֆրանսիայի, Գերմանիայի, Բելգիայի, Ավստրիայի,
Հունաստանի եւ այլ երկրների բարձրագույն ուսումնական
հաստատությունների հետ: Այս մասին հոկտեմբերի 10-ին Երեւանի
պետական համալսարանում կայացած «Տեղեկատվության օր» միջոցառմանը
հայտնեց Հայաստանում ծրագրի ղեկավար Իրինա Մովսիսյանը:
Նրա խոսքերով, Հայաստանում ընդհանուր առմամբ իրականցվում է
3-ամյա 28 ծրագիր` մենեջմենթի, սոցիալական աշխատանքի ու
քաղաքականության, բժշկագիտական եւ ինժեներական գիտությունների եւ
այլ բնագավառներում: Ըստ նրա, ուսանողներն այս ծրագրերում մեծ թիվ
չեն կազմում. նախագծերին հիմնականում մասնակցում են բուհերի
դասախոսներն ու ասպիրանտները:
ԵՊՀ-ի ուսումնական գծով պրոռեկտոր Ալեքսանդր Գրիգորյանը
տեղեկացրեց, որ ներկայումս բուհում գործող ամենամեծ` Միացյալ
եվրոպական ծրագիրն (JEP) ուղղված է բուհի գրադարանային գործի
բարելավմանն ու էլեկտրոնային գրադարանի ստեղծմանը: Այդ
աշխատանքների իրականացման համար բուհը համագործակցում է Հաննովերի
եւ մի շարք եվրոպական այլ համալսարանների հետ: ԵՊՀ-ի պրոռեկտորը
նշեց նաեւ, որ JEP-ի դրամաշնորհների միջոցով համալսարանում
նախատեսվում է ներդնել նաեւ հեռաուսուցման համակարգ, ինչը
հնարավորություն կտա ուսուցումը կազմակերպել նոր մեթոդներով`
ինտերնետով եւ էլեկտրոնային փոստի միջոցով: