ԱԴՐԲԵՋԱՆԻ ՊԱՇՏՊԱՆՈՒԹՅԱՆ ՆԱԽԱՐԱՐԸ ԳԱՆԳԱՏՎԵԼ Է ՆԱՏՕ-Ի ԳԼԽԱՎՈՐ
ՔԱՐՏՈՒՂԱՐԻ ՀԱՏՈՒԿ ՆԵՐԿԱՅԱՑՈՒՑՉԻՆ
09-10-2006 19:45:00 | Ադրբեջան | Միջազգային
ԲԱՔՈՒ, 9 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Միջազգային
կազմակերպությունները պետք է Հայաստանի վրա ճնշում գործադրեն
ղարաբաղյան հարցում: Ինչպես հաղորդում է Ադրբեջանի պաշտպանության
նախարարության մամլո ծառայությունը, այս մասին հոկտեմբերի 9-ին
հայտարարել է պաշտպանության նախարար Սաֆար Աբիեւը Կովկասում եւ
Կենտրոնական Ասիայում ՆԱՏՕ-ի գլխավոր քարտուղարի հատուկ
ներկայացուցիչ Ռոբերտ Սիմոնսի հետ հանդիպման ժամանակ:
Նախարարը նշել է, որ ղարաբաղյան հակամարտության
չկարգավորվածությունը խոչընդոտում է ՆԱՏՕ-ի հետ Ադրբեջանի կապերի
զարգացմանը: Նա նաեւ հյուրին ի գիտություն հայտնել է, որ ՆԱՏՕ-ի
«Գործընկերություն հանուն խաղաղության» ծրագրի հիմնական
սկզբունքներից մեկը յուրաքանչյուր երկրի տարածքային
ամբողջականության հարգումն է: Չնայած նրան, որ Հայաստանը այդ
ծրագրի անդամ է, նա անտեսում է այդ պարտավորությունը, ինչպես նաեւ
ՄԱԿ-ի Անվտանգության խորհրդի կողմից ընդունված չորս բանաձեւերը,-
հաղորդում է «Թրենդը»: