ՊԵՏԴՈՒՄԱՆ ՎԱՎԵՐԱՑՐԵԼ Է ՌՈՒՍԱՍՏԱՆԻ ԵՎ ՎՐԱՍՏԱՆԻ ԵՐԿՈՒ
ՀԱՄԱՁԱՅՆԱԳԻՐ
06-10-2006 17:27:00 | Ռուսաստան | Միջազգային
ՄՈՍԿՎԱ, 6 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Պետդուման քվեարկության
է դրել Ռուսաստանի եւ Վրաստանի երկու համաձայնագրեր, որոնցից մեկը
վերաբերում է վրացական տարածքում ռուսական ռազմական բազաների
ժամանակավոր գտնվելու ժամկետներին եւ հանրապետությունից դրանց
դուրս բերմանը: Երկրորդ փաստաթուղթը սահմանում է, թե ինչպես է
իրականացվելու ռազմական բեռների եւ անձնակազմի տրանզիտը: Առաջին
փաստաթղթում ամրագրվում է այն դրույթը, որ ռուսական ռազմական
բազաների եւ ռազմական օբյեկտների դուրս բերումը իրականացվելու է
փուլ առ փուլ 2008 թվականի ընթացքում: Ընդ որում, գտնվելով
դուրսբերման ռեժիմում, Բաթումի եւ Ախալքալաքի ռուսական ռազմական
բազաները շարունակում են գործել: Մինչեւ գործընթացի ավարտը
վրացական կողմը պարտավորվում է ռուս զինվորականներին եւ նրանց
ընտանիքի անդամներին ժամանակավոր անհատույց օգտագործման համար
տրամադրել բնակարան «Զվեզդա» օբյեկտների սահմաններում:
Զինվորականները պետք է հեռանան 2007 թվականի դեկտեմբերի 31-ից ոչ
ուշ:
Փաստաթղթում մտավախություն կա նաեւ, որ ռուսական զորքերի
դուրսբերումը Վրաստանի տարածքից կարող է հանգեցնել
աշխարհաքաղաքական իրադրության սրման, եւ որ թողնված բազաները կարող
են Թբիլիսիի կողմից օգտագործվել ՆԱՏՕ ընդունվելու դեպքում: Ուստի
պատգամավորները առաջարկել են վերահսկել այն, ինչ կատարվելու է
Վրաստանի տարածքում այնտեղից ռուսական զորքերի դուրսբերումից հետո:
Ախալքալաքի բազան պետք է փակվի մինչեւ 2007 թվականի վերջը,
իսկ Բաթումում` 2008 թվականի վերջը: Մինչ այդ կավարտվի նաեւ
Վրաստանից մյուս ռուսական ռազմական օբյեկտների դուրսբերումը,-
հաղորդում են ռուսական ԶԼՄ-ները: