ՀՈԿՏԵՄԲԵՐԸ ՀԱՅԱՍՏԱՆՈՒՄ ՀԱՅՏԱՐԱՐՎԵԼ Է «ԶԳԱՍՏՈՒԹՅԱՆ ԱՄԻՍ»
06-10-2006 14:52:00 | Հայաստան | Հասարակություն
ԵՐԵՎԱՆ, 6 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հայ-ամերիկյան
առողջության կենտրոնը ՀՀ Առողջապահության նախարարության հետ
համատեղ հոկտեմբեր ամիսը հայտարարել են «Զգաստության ամիս»:
Զարգացած երկրներում ավանդաբար անցկացվող նման միամսյակների
նպատակն է հասարակության ուշադրությունը հրավիրել կրծքագեղձի
քաղցկեղի հիմնահարցի վրա: Այդ ամսվա ընթացքում կրծքագեղձի
հետազոտությունները իրականացվում են անվճար:
Միամսյակի շրջանակում հոկտեմբերի 6-ին Երեւանում կազմակերպվեց
«Առողջության քայլարշավ»` Հայ-ամերիկյան առողջության կենտրոնից
մինչեւ Մատենադարան: Միջոցառմանը մասնակցում էին տեղական եւ
միջազգային կազմակերպությունների ներկայացուցիչներ, հանրակրթական
դպրոցների աշակերտներ, քոլեջների եւ բուհերի ուսանողներ:
Ինչպես նշեց Հայ-ամերիկյան առողջության կենտրոնի տնօրեն
Խաչանուշ Հակոբյանը, նման միջոցառումների նպատակն է մեկ անգամ եւս
հասարակության ուշադրությունը հրավիրել քաղցկեղի վտանգների վրա:
Ըստ նրա, քաղցկեղի վաղ ախտորոշումն է միակ այն ձեւը, որը
հնարավորություն է տալիս փրկել այդ հիվանդությամբ տապապող
մարդկանց: Խ.Հակոբյանի խոսքերով, այդ առումով կարեւոր է, որպեսզի
հատկապես 40 տարեկանից հետո յուրաքանչյուր կին տարին գոնե մեկ
անգամ անցնի մամոգրաֆիկ հետազոտություն: Նշվեց նաեւ, որ 1997թ.-ից
կենտրոնում հետազոտվել են 80 հազարից ավելի կանայք: նրանցից 4%-ի
մոտ հայտնաբերվել են չարորակ գոյացություններ, իսկ 68%-ն ունեցել է
բարորակ փոփոխություններ: