ՆԱԽԱՏԵՍՎՈՒՄ Է ՔՐԵԱԿԱՆ ՊԱՏԱՍԽԱՆԱՏՎՈՒԹՅՈՒՆ ՍԱՀՄԱՆԵԼ
ՑԵՂԱՍՊԱՆՈՒԹՅՈՒՆԸ ՀԵՐՔԵԼՈՒ ԿԱՄ ԱՐԴԱՐԱՑՆԵԼՈՒ ՀԱՄԱՐ
04-10-2006 16:57:00 | Հայաստան | Հասարակություն
ԵՐԵՎԱՆ, 4 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: ՀՀ Ազգային Ժողովի
հոկտեմբերի 4-ի նիստում առաջին ընթերցմամբ ընդունված ՀՀ Քրեական
օրենսգրքում փոփոխություններ եւ լրացումներ նախատեսող օրինագծով
քրեական պատասխանատվություն է սահմանվում ցեղասպանությունը եւ
խաղաղության ու մարդկության անվտանգության դեմ ուղղված մյուս
հանցագործությունները հերքելու, մեղմացնելու, դրանց հավանություն
տալու կամ արդարացնելու համար: Առաջարկվում է նշված արարքների
համար որպես պատժամիջոց կիրառել տուգանքը` նվազագույն (1000 դրամ)
աշխատավարձի հարյուրապատիկից երեքհարյուրապատիկի չափով, կամ
ազատազրկումը` առավելագույնը 4 տարի ժամկետով:
Առաջին ընթերցմամբ ընդունվեց նաեւ «Առանց ծնողական խնամքի
մնացած երեխաների սոցիալական պաշտպանության մասին» օրենքում
լրացումներ կատարելու մասին օրինագիծը: Ըստ այդմ, մասնավորապես,
նախատեսվում է հիշյալ կատեգորիայի երեխաների խնամքն ու
դաստիարակությունը իրականացնող պետական մասնագիտացված հիմնարկների
աշխատողների ամսական աշխատավարձի բարձրացում: Վերջինիս չափը չի
կարող ցածր լինել երկրում սահմանված նվազագույն աշխատավարձի չափի
եռապատիկից, որի նկատմամբ սահմանվում է նաեւ հավելավճար` աշխատողի
տարիֆային աշխատավարձի 50%-ի չափով:
Նիստում երկրորդ ընթերցմամբ եւ ամբողջությամբ ընդունվեց
«Զինծառայողների եւ նրանց ընտանիքների անդամների սոցիալական
ապահովության մասին» ՀՀ օրենքում փոփոխություն եւ լրացումներ
կատարելու մասին» օրինագիծը: