ՎՐԱՍՏԱՆՈՒՄ ՁԵՐԲԱԿԱԼՎԱԾ ՉՈՐՍ ՌՈՒՍ ՍՊԱՆԵՐԻՆ ՆԵՐԿԱՅԱՑՎԵԼ Է
ՄԵՂԱԴՐԱՆՔ
29-09-2006 16:46:00 | Վրաստան | Միջազգային
ԹԲԻԼԻՍԻ, 29 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Չորս ռուս սպաներին եւ
Վրաստանի այն 11 քաղաքացիներին, որ սեպտեմբերի 27-ին ձերբակալվել
են Վրաստանի ՆԳՆ հակահետախուզության դեպարտամենտի աշխատակիցների
կողմից, ներկայացվել է լրտեսության պաշտոնական մեղադրանք: Այս
մասին «Կավկազպրեսին» հայտնել է Վրաստանի ՆԳՆ վարչակազմի պետ Շոթա
Խիզանիշվիլին: Մեղադրանք է ներկայացվել փոխգնդապետ Ալեքսանդր
Սավվային, փոխգնդապետ Դմիտրի Կազանցեւին, փոխգնդապետ Ալեքսանդր
Բարանովին եւ 2-րդ կարգի կապիտան Ալեքսանդր Զավգորոդնուն: «Ներկա
դրությամբ իրավապահ մարմինների կողմից ձերբակալված է չորս ռուս
սպա: Ինչ վերաբերում է պայմանագրային ծառայության մեջ գտնվող ավագ
Ռուսլան Սկրիլնիկովին, նա ձերբակալվածների վարորդն է եւ այն բանից
հետո, երբ քննիչները նրան մի քանի հարց են տվել, զինծառայողը ազատ
է արձակվել»,- ընդգծել է Խիզանիշվիլին:
Ինչ վերաբերում է Բաթումում ձերբակալված Ամիր Ասլանյանին, որի
մասին կանխավ հաղորդվել էր, որ նա ռուսական սպա է, ապա Վրաստանի
ՆԳՆ վարչակազմի ղեկավարը նշել է, որ Ասլանյանը Վրաստանի բնակիչ է
եւ Վրաստանի քաղաքացի: Ձերբակալված ռուս սպաների հետ համագործակցած
Վրաստանի ձերբակալված քաղաքացիներին եւս ներկայացվել է Հայրենիքի
դավաճանության մեղադրանք: