ՌՈԲԵՐՏ ԷՄՄԻՅԱՆԻ ԱՆՎԱՆ 5-ՐԴ ՄԻՋԱԶԳԱՅԻՆ ՄՐՑԱՇԱՐԸ ՆՎԻՐՎՈՒՄ Է
ՀԱՅԱՍՏԱՆԻ ԱՆԿԱԽՈՒԹՅԱՆ 15-ԱՄՅԱԿԻՆ
31-08-2006 19:00:00 | Հայաստան | Սպորտ
ԵՐԵՎԱՆ, 31 ՕԳՈՍՏՈՍԻ, ՆՈՅՅԱՆ ՏԱՊԱՆ: Սեպտեմբերի 17-ին
Վանաձորում կանցկացվի Եվրոպայի հեռացատկի ռեկորդակիր Ռոբերտ
Էմմիյանի անվան միջազգային 5-րդ մրցաշարը: Այդ առթիվ Հայաստան
կժամանեն տարբեր երկրների ճանաչված հեռացատկորդներ: «ՆՈՅՅԱՆ
ՏԱՊԱՆ»-ի թղթակցի հետ զրույցում Ռ.Էմմիյանը նշեց, որ այս տարվա
մրցաշարը նվիրվում է Հայաստանի անկախության 15-ամյակին:
Եվրոպական իր առաջին ռեկորդը հայ մարզիկը սահմանեց 1986-ին
Բարի կամքի խաղերում` հեռացատկելով 8 մ 61 սմ: Լրանում է այդ
նվաճման 20 տարին: Իսկ մեկ տարի անց Ռ.Էմմիյանը սահմանեց նոր
ռեկորդ` 8 մ 86 սմ, որը մինչ օրս մնում է չգերազանցված:
Նշենք, որ Ռ.Էմմիյանը ներկայումս բնակվում է Քաթարի
մայրաքաղաք Դոհայում: Նա Քաթարի ազգային օլիմպիական կոմիտեի
նախագահ Շեյխ Թամիմ Ալ-Թանի գլխավոր խորհրդականն է: Դեկտեմբերի
1-15-ին Դոհայում կանցկացվեն Ասիական խաղերը, որտեղ Ռ.Էմմիյանը
Քաթարի մարզիկների մասնակցության գլխավոր պատասխանատուներից մեկն է
լինելու: