ԻԼՀԱՄ ԱԼԻԵՎ. «ԱԴՐԲԵՋԱՆԸ, ԲԱՑԻ ՂԱՐԱԲԱՂԻՑ, ՈՉ ՄԻ ԽՆԴԻՐ ՉՈՒՆԻ»
23-06-2006 18:38:00 | Ադրբեջան | Միջազգային
ԲԱՔՈՒ, 23 ՀՈՒՆԻՍԻ, ՆՈՅՅԱՆ ՏԱՊԱՆ: «Համար մեկ խնդիրը, որ
ծառացած է երկրի առջեւ, ղարաբաղյան հակամարտության լուծումն է
Ադրբեջանի եւ Հայաստանի միջեւ: Այդ ոլորտում, ցավոք, որեւէ
առաջխաղացում չկա: Բանակցություններ են վարվում, բայց ոչ մի
արդյունավետություն չկա, քանի որ մենք չենք կարողանում արդյունքի
հասնել»: Այս մասին, ինչպես հաղորդում է «Թրենդը», այսօր
հայտարարել է Ադրբեջանի նախագահ Իլհամ Ալիեւը` ելույթ ունենալով
Հեյդար Ալիեւի անվան բարձրագույն ռազմական ուսումնարանի
շրջանավարտների առջեւ:
«Մինչեւ ե՞րբ ենք մասնակցելու բանակցություններին: Մինչեւ
ե՞րբ ենք սպասելու: Մեր համբերությունը անսահման չէ: Այսօր
Ադրբեջանը արագ զարգացող երկիր է: Հայաստանը չի կարող մրցակցել մեզ
հետ ո'չ տնտեսական, ո'չ քաղաքական, ո'չ ռազմական տեսակետից: Թող
մտածեն Հայաստանում, թե որտեղ կլինի Ադրբեջանը եւ որտեղ Հայաստանը
մեկ, երեք, հինգ տարի անց: Հայաստանը ոչ մի հնարավորություն չունի
զարգացման համար: Նրանք բոլոր միջազգային տարածաշրջանային
նախագծերից մեկուսացված են: Բնակչության մոտ կեսը լքել է երկիրը:
Մեր տվյալներով, նույնիսկ շփման գծի պահպանության համար նրանք
դժվարություններ են զգում, քանի որ կենդանի ուժը չի հերիքում»,-
հայտարարել է Ադրբեջանի նախագահը:
«Ոչ մի խնդիր, բացի Ղարաբաղից, Ադրբեջանը չունի: Եվ այդ
պատճառով բոլոր անհրաժեշտ միջոցները պետք է ուղղվեն բանակի
ձեւավորմանը»,- նկատել է Իլհամ Ալիեւը: