ԲԱՔՈՒ, 8 ՀՈՒՆԻՍԻ, ՆՈՅՅԱՆ ՏԱՊԱՆ: «Հայաստանի, Ադրբեջանի եւ Լեռնային Ղարաբաղի ներկայացուցիչներից անհետ կորած քաղաքացիների հարցերի եռակողմ աշխատանքային խումբ ստեղծելու Հայաստանի խորհրդարանի նախագահ Տիգրան Թորոսյանի առաջարկությունն անընդունելի է»: Այս մասին, ինչպես հաղորդում է ԱՊԱ-ն, հայտարարել է Եվրոպայի Խորհրդի Խորհրդարանական վեհաժողովում Ադրբեջանի պատվիրակության անդամ, պատգամավոր Գյուլթեքին Հաջիեւան: Ըստ նրա, այդ առաջարկն արվել է քաղաքական նպատակով` գործընթացում որպես երրորդ կողմ Լեռնային Ղարաբաղը ներգրավելու համար: «Մենք չենք կարող ընդունել այդ առաջարկը: Եվ դա միանշանակ է: Լեռնային Ղարաբաղը Ադրբեջանի տարածքի մի մասն է եւ բանակցությունների սեղանի շուրջ նրան կարող է ներկայացնել միայն Ադրբեջանի Հանրապետությունը»,- հայտարարել է պատգամավորը:

---