ԵՎՐԱԽՈՐՀՐԴԱՐԱՆ. ԱԴՐԲԵՋԱՆԻ ԻՇԽԱՆՈՒԹՅՈՒՆՆԵՐԸ ՀՐԵՇԱՎՈՐ
ՎԱՆԴԱԼԻԶՄԻ ԱԿՏ ԵՆ ԻՐԱԿԱՆԱՑՐԵԼ
31-05-2006 16:46:00 | Ռուսաստան | Միջազգային
ՄՈՍԿՎԱ, 31 ՄԱՅԻՍԻ, ՆՈՅՅԱՆ ՏԱՊԱՆ: Եվրախորհրդարանի
պատգամավորների եւ Ադրբեջանի ԱԳՆ միջեւ կրկին սկանդալ է բորբոքվել
Նախիջեւանում հին հայկական գերեզմանատան ավերման պատճառով, գրում է
«Ինդիփենդենթը»: Եվրոպացիներին վրդովեցրել է այն, որ պաշտոնական
Բաքուն հրաժարվել է թույլ տալ նրանց լինելու Հին Ջուղայի
գերեզմանատանը, որտեղ, աղբյուրների տեղեկատվությամբ, 2005 թվականի
դեկտեմբերին բարբարոսաբար ոչնչացվել են մշակույթի հուշարձանները`
խաչքարերը: Ադրբեջանցի զինվորականները, ծանր տեխնիկայի օգնությամբ
ոչնչացնելով մոտ 3500 խաչքարեր, 2006 թվականի մարտի սկզբին այդ
տարածքը մաքրել են եւ այնտեղ սարքել զինափորձարան:
«Ադրբեջանի իշխանությունները իրականացրել են հրեշավոր
վանդալիզմի ակտ»,- հայտարարել է պատգամավորներից մեկը:
Եվրախորհրդարանի ներկայացուցիչ Չարլզ Տաննոկը կատարվածը համեմատել
է աֆղանական Բամիանի նահանգում Բուդդայի արձանների ավերման հետ,
որը ողջ աշխարհի զայրույթն էր հարուցել:
Ադրբեջանական ԱԳՆ-ն նախկինի պես ժխտում է բոլոր
մեղադրանքները` հայտարարելով եվրախորհրդարանականների շարքերում
տիրող «հիստերիայի» եւ «նախապաշարմունքի» մասին: Վերջիններս, իրենց
հերթին, մտադիր չեն նահանջել. պատգամավոր Հաննես Սվոբոդան
հայտարարել է, որ 2006 թվականի աշնանը ծրագրված այցի ընթացքում
այնուամենայնիվ հույս ունի լինել գերեզմանատան տարածքում:
Հիշեցնենք, որ 2006 թվականի փետրվարին Եվրախորհրդարանը բանաձեւ է
ընդունել, որով դատապարտվում է Հին Ջուղայի հայկական մշակութային
հուշարձանների ոչնչացման Ադրբեջանի գործողությունները,- հաղորդում
է «Լենտա.ռուն»: