ԱԴՐԲԵՋԱՆԻ ԱԳՆ. ՌԴ ՊԵՏԴՈՒՄԱՅԻ ՓՈԽԽՈՍՆԱԿԻ ՀԱՅՏԱՐԱՐՈՒԹՅՈՒՆՆԵՐԸ
ՉԵՆ ԱՐՏԱՑՈԼՈՒՄ ՌՈՒՍԱՍՏԱՆԻ ԴԱՇՆՈՒԹՅԱՆ ՔԱՂԱՔԱԿԱՆՈՒԹՅՈՒՆԸ
26-05-2006 19:39:00 | Ադրբեջան | Միջազգային
ԲԱՔՈՒ, 26 ՄԱՅԻՍԻ, ՆՈՅՅԱՆ ՏԱՊԱՆ: Ադրբեջանի ԱԳՆ մամուլի եւ
տեղեկատվական քաղաքականության վարչության պետ Թայիր Թաղիզադեն
լրագրողներին հայտարարել է, որ Վլադիմիր Ժիրինովսկին
հայտարարություններ է անում, որոնք չեն արտացոլում Ռուսաստանի
Դաշնության արտաքին քաղաքականությունը եւ հակասում են այն երկրի
շահերին, որի հետ նա լավ հարաբերություններ ունի: «Նա պետք է ավելի
պատասխանատու լինի իր զբաղեցրած պաշտոնում: Ժիրինովսկու նման
հայտարարությունները բացասաբար են ազդում ղարաբաղյան
հակամարտության կարգավորման գործընթացի վրա, հակասում են
ադրբեջանա-ռուսական զարգացող բարեկամական հարաբերություններին:
Ժիրինովսկու այդ բնույթի հայտարարությունները արդեն նորմա են
դարձել»,- ասել է Թաղիզադեն:
Հիշեցնենք, որ Ռուսաստանի Պետական դումայի փոխխոսնակ Վլադիմիր
Ժիրինովսկին հայտարարել էր, որ «նախկին ԽՍՀՄ տարածքի չճանաչված
հանրապետությունները, այդ թվում Աբխազիան, Մերձդնեստրը եւ Լեռնային
Ղարաբաղը կգնան Չեռնոգորիայի ճանապարհով: Չեռնոգորիայի անկախության
հանրաքվեն միջազգային իրավունքի նախադեպ կդառնա»: Ինչպես
հայտարարել է Ժիրինովսկին, «ԼՂՀ-ն, ընտրելով Չեռնոգորիայի ուղին,
կարող է անկախություն ստանալ: Նա լրիվ իրավունք ունի դառնալու
անկախ պետություն»: