ԱԳՐԱՐԱՅԻՆ ՀԱՄԱԼՍԱՐԱՆԻ ՎԱՆԱՁՈՐԻ ՄԱՍՆԱՃՅՈՒՂԻ ՀԵՌԱԿԱ ԲԱԺՆՈՒՄ
ՈՒՍԱՆՈՒՄ ԵՆ 68 ԱՌԱՋԻՆ ԿՈՒՐՍԵՑԻՆԵՐ
12-04-2006 12:10:00 | Հայաստան | Հասարակություն
ՎԱՆԱՁՈՐ, 12 ԱՊՐԻԼԻ, ՆՈՅՅԱՆ ՏԱՊԱՆ: Հայաստանի Պետական
Ագրարային համալսարանի Վանաձորի մասնաճյուղի հեռակա ուսուցման
նորաբաց բաժնում պարապմունքներն սկսվել են «Հողաշինարարություն եւ
հողային կադաստր», «Հաշվապահական հաշվառում եւ աուդիտ»,
«Անասնաբուժական սանիտարական փորձաքննություն» մասնագիտությունների
գծերով: Ինչպես «ՆՈՅՅԱՆ ՏԱՊԱՆ»-ի թղթակցին հայտնեց մասնաճյուղի
տնօրենի պաշտոնակատար, գյուղտնտեսական գիտությունների թեկնածու
Ալեքսանդր Հակոբյանը, բաժնի առաջին կուրսերում ընդգրկված են 68
ուսանողներ:
Ըստ նրա, հաջորդ ուսումնական տարում, բացի վերոհիշյալ
մասնագիտություններից, նախատեսված է մասնաճյուղում ընդունելություն
կատարել նաեւ «Անտառային տնտեսություն եւ բնակավայրերի
կանաչապատում», «Անասնաբուծություն», «Ագրոնոմիա»,
«Գյուղատնտեսության մեքենայացում», «Կաթի եւ կաթնամթերքի
տեխնոլոգիա» մասնագիտությունների գծով:
Ալ.Հակոբյանը նշեց, որ ամեն ինչ արվում է մասնաճյուղում
ուսուցումը ժամանակակից կրթական չափորոշիչներին համապատասխան
կազմակերպելու համար: Նրա խոսքերով, որակյալ դասախոսական կազմի եւ
համապատասխան նյութատեխնիկական բազայի առկայությունը հուսալի
երաշխիք են, որ ուսումնական հաստատությունը կդառնա տարածաշրջանի
գյուղատնտեսության համար որակյալ մասնագետների պատրաստման լավ
դարբնոց: