ՖԻԴԵ-Ի ՑՈՒՑԱԿՈՒՄ ԼԵՎՈՆ ԱՐՈՆՅԱՆԸ 3-ՐԴՆ Է, ՀԱՅԱՍՏԱՆԸ` 5-ՐԴ
03-04-2006 18:10:00 | Հայաստան | Սպորտ
ԵՐԵՎԱՆ, 3 ԱՊՐԻԼԻ, ՆՈՅՅԱՆ ՏԱՊԱՆ: Շախմատի միջազգային
ֆեդերացիան (ՖԻԴԵ) հրապարակել է ուժեղագույնների վարկանիշային
ցուցակը` 2006թ. ապրիլի 1-ի դրությամբ: Առաջին անգամ նրանում տեղ
չի գտել երկարամյա առաջատարը` աշխարհի 13-րդ չեմպիոն Գարրի
Կասպարովը (Ռուսաստան), քանի որ ավելի քան մեկ տարի հանդես չի
գալիս մրցաշարերում: Ցուցակը գլխավորում է աշխարհի չեմպիոն Վեսելին
Թոփալովը (Բուլղարիա), որի անհատական վարկանիշը 2804 միավոր է:
Նրանից ընդամենը մեկ միավորով է ետ մնում Վիշվանաթան Անանդը
(Հնդկաստան, 2803): Հայաստանի ներկայացուցիչ, աշխարհի գավաթակիր
Լեւոն Արոնյանը զգալիորեն բարձրացրել է իր վարկանիշը եւ
ուժեղագույնների ցուցակում զբաղեցնում է պատվավոր 3-րդ տեղը
(2756):
Աշխարհի ուժեղագույն շախմատիստների ցուցակի 1-ին
հարյուրյակում տեղեր են գրավում Հայաստանի եւս 3 ներկայացուցիչներ:
Վլադիմիր Հակոբյանը 16-րդն է (2706), Կարեն Ասրյանը` 61-րդը
(2646), Սմբատ Լպուտյանը` 94-րդը (2619): Հարյուրյակում տեղ է
գրավել եւս մեկ հայ շախմատիստ` Սլովակիայի ներկայացուցիչ Սերգեյ
Մովսիսյանը:
Ուժեղագույն շախմատիստուհիների ցուցակը մեծ առավելությամբ
գլխավորում է Հուդիթ Պոլգարը (Հունգարիա), որը բացառապես
տղամարդկանց մրցաշարերի է մասնակցում: Նրա անհատական վարկանիշն է
2711 միավոր: Աշխարհի նորընծա չեմպիոնուհի Քսյու Յուհուան
(Չինաստան) միայն 5-րդ տեղում է (2517):
Հայաստանի երկու ներկայացուցիչներ` Լիլիթ Մկրտչյանը եւ Էլինա
Դանիելյանը, զբաղեցնում են, համապատասխանաբար, 21-րդ եւ 38-րդ
տեղերը: Մկրտչյանի վարկանիշը 2453 է, Դանիելյանինը` 2422:
ՖԻԴԵ-ն միաժամանակ հրապարակել է տարբեր երկրների 10
ուժեղագույն շախմատիստների միջին վարկանիշները: Առաջին հնգյակն
այսպիսին է` Ռուսաստան (միջին վարկանիշը` 2716), Ուկրաինա (2663),
ԱՄՆ (2625), Ֆրանսիա (2623), Հայաստան (2616): Հայաստանը պահպանում
է իր տեղը ուժեղագույնների մեջ: