ԱՐՏԱՇԵՍ ՇԱՀԻՆՅԱՆԻ ԱՆՎԱՆ ՖԻԶՄԱԹ ԴՊՐՈՑԸ 40 ՏԱՐԵԿԱՆ Է
26-09-2005 19:00:00 | Հայաստան | Հասարակություն
ԵՐԵՎԱՆ, 26 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Երեւանի պետական
համալսարանին առընթեր Արտաշես Շահինյանի անվան
ֆիզիկա-մաթեմատիկական հատուկ դպրոցի շուրջ 4000 շրջանավարտներից
շատերն այսօր գիտության եւ տնտեսության առաջավորներ են, ազգային եւ
հասարակական գործիչներ, կրթության եւ մշակույթի նվիրյալներ: Ինչպես
դպրոցի հմնադրման 40-ամյակին նվիրված սեպտեմբերի 26-ի հանդիսության
ժամանակ նշեց դպրոցի տնօրեն Հայկազ Նավասարդյանը, նրանցից շատերն
այսօր արտերկրում հայտնի են իրենց գիտական հայտնագործություններով:
Տնօրենի խոսքերով, դպրոցի հիմնադրման նպատակն է եղել
Հայաստանի տարբեր շրջանների եւ Հայաստանից դուրս գտնվող հայաշատ
բնակավայրերի ֆիզիկամաթեմատիկական առարկաներից արտակարգ
ընդունակություններ դրսեւորած երեխաների համար խորացված ուսուցման
կազմակերպումը: «Դպրոցն իր գոյության տարիներին եղել եւ մնում է
դպրոցական առարկայական օլիմպիադաների դարբնոցը»,- ընդգծեց
Հ.Նավասարդյանը: Հայաստանը միայն 1992թ.-ից է սկսել մասնակցել
միջազգային օլիմպիադաներին, որոնց մասնակցած այս դպրոցի սաներից
28-ը արժանացել են մեդալների, իսկ 11-ը` գովասանագրերի մաթեմատիկա,
ֆիզիկա, ինֆորմատիկա, աստղագիտություն եւ քիմիա առարկաներից: