2006 Թ.-ԻՆ ՆԱԽԱՏԵՍՎՈՒՄ Է ՄՈՏ 87 ՄԼՆ ԴՐԱՄ ՀԱՏԿԱՑՆԵԼ
ԱՆՕԹԵՎԱՆՆԵՐԻ ՍՈՑԻԱԼԱԿԱՆ ՕԳՆՈՒԹՅԱՆ ԿԵՆՏՐՈՆԻ ՍՏԵՂԾՄԱՆ ՆՊԱՏԱԿՈՎ
12-09-2005 18:35:00 | Հայաստան | Հասարակություն
ԵՐԵՎԱՆ, 12 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: 2006թ.-ին առաջին անգամ
նախատեսվում է պետական բյուջեից մոտ 87 մլն դրամ (մոտ 193 հազ. ԱՄՆ
դոլար) հատկացնել Երեւանում անօթեւան մնացած մարդկանց համար
սոցիալական օգնության կենտրոն ստեղծելու նպատակով: Այս մասին
«ՆՈՅՅԱՆ ՏԱՊԱՆ»-ի թղթակցին հայտնեց ՀՀ Աշխատանքի եւ սոցիալական
հարցերի նախարարության Հաշմանդամների եւ տարեցների հիմնահարցերի
վարչության պետ Ջեմմա Բաղդասարյանը: Նա նշեց, որ կենտրոնում
անօթեւանները կբնակվեն մի քանի ամիս, կստանան բժշկահոգեբանական
ծառայություն, անվճար սննունդ: Իսկ իրավաբանական, փաստաթղթային եւ
մի շարք այլ սոցիալական հարցերի պարզաբանումից հետո նրանց
կտեղավորեն պետական խնամատար տարբեր հաստատություններում:
Ըստ Ջ.Բաղդասարյանի, կենտրոնը, որը կտեղակայվի Չորրորդ գյուղի
թիվ 1 տուն-ինտերնատին կից շինությունում, կսկսի գործել 2007թ.-ի
սկզբներից: Իսկ մինչ այդ` արդեն այս ձմռանը, նախատեսվում է
վերանորոգել շենքի 2-3 սենյակներ` առավել ծանր պայմաններում գտնվող
մարդկանց օգնություն ցուցաբերելու նպատակով: