ԵՐԵՎԱՆ, 1 ՕԳՈՍՏՈՍԻ, ՆՈՅՅԱՆ ՏԱՊԱՆ: Կաննում անցկացված 2
միջազգային մրցաշարերում, որոնք կրում էին «Ոսկե գավաթ» եւ
«Ազգությունների գավաթ» անվանումները, Հայաստանի նարդիստները 6
մրցանակ շահեցին: «Ոսկե գավաթ» մրցաշարի «B» խմբում Սիրաժ
Ղամբարյանը գրավեց 2-րդ տեղը, իսկ «C» խմբում Անդրանիկ
Հարությունյանը դարձավ հաղթող: «Ազգությունների գավաթ» մրցաշարի
«B» խմբում 1-ին տեղը գրավեց նախկինում ճանաչված բռնցքամարտիկ,
այժմ Մոսկվայում բնակվող, բայց Հայաստանը ներկայացնող Մանվել
Ավետիսյանը: Այս խմբում 2-րդ տեղը գրավեց Կոլյա Մոսոյանը:
«Ազգությունների գավաթ»-ում մրցանակակիրներ դարձան նաեւ Սիրաժ
Ղամբարյանը եւ Անդրանիկ Հարությունյանը:
Մոնտե Կառլոյում անցկացված աշխարհի առաջնությունում առավել
հաջող հանդես եկավ Ավետիս Ռոստոմյանը: Երկրորդ տարին անընդմեջ նա
«B» խմբի մրցումների եզրափակիչ մտավ եւ գրավեց 2-րդ տեղը: Աշխարհի
առաջնության «B» եւ «C» խմբերում մրցանակներ նվաճեցին նաեւ
Հարություն Մարտիրոսյանը, Մանվել Ավետիսյանը, Անդրանիկ
Հարությունյանը: