ԻՐԱՆԻ ԲՌՆՑՔԱՄԱՐՏԻԿՆԵՐԻ ՀԵՏ ԸՆԿԵՐԱԿԱՆ ՀԱՆԴԻՊՈՒՄՆ ԱՆՑԱՎ ՀԱՅ
ՄԱՐԶԻԿՆԵՐԻ ԱՌԱՎԵԼՈՒԹՅԱՄԲ
27-06-2005 19:24:00 | Հայաստան | Սպորտ
ԵՐԵՎԱՆ, 27 ՀՈՒՆԻՍԻ, ՆՈՅՅԱՆ ՏԱՊԱՆ: Երեւանի «Դինամո»
մարզադահլիճում ընկերական հանդիպում անցկացրին բռնցքամարտի
Հայաստանի եւ Իրանի ազգային հավաքականները: Հանդիպումն ընթացավ
Հայաստանի բռնցքամարտիկների առավելությամբ եւ ավարտվեց նրանց
հաղթանակով` 8,5-4,5 հաշվով: Իրենց մրցակիցներին պարտության
մատնեցին Հովհաննես Դանիելյանը (48 կգ քաշային կարգ), Գաբրիել
Տոլմաջյանը, Հարություն Թովմասյանը (2-ն էլ` 54 կգ), Հրաչյա
Ջավախյանը (60 կգ), Արտյոմ Հովհաննիսյանը (64 կգ), Սամվել
Մաթեւոսյանը (69 կգ), Անդրանիկ Հակոբյանը (75 կգ), Արտակ
Մալումյանը (91 կգ), իսկ գերծանր` 91 կգ-ից բարձր, քաշայիններ
Արսեն Գալստյանի եւ Ալի Ռեզա Շոարիի հանդիպումն ավարտվեց ոչ-ոքի:
Նշենք, որ մինչեւ մրցամարտը երկու երկրների բռնցքամարտիկները
երկշաբաթյա համատեղ ուսումնամարզական հավաք էին անցկացրել Արարատ
քաղաքի «Այգ» մարզահամալիրում: